អឺរ៉ុប៖ ក្រុមមន្ត្រីសហភាពអឺរ៉ុបបានស្ដីបន្ទោសក្រុង Moscow ពីបទបង្កឲ្យមានវិបត្តិស្បៀងអាហារពិភពលោកកាន់តែធ្ងន់ធ្ងរ ខណៈការបិទកំពង់ផែអ៊ុយក្រែនពីសំណាក់រុស្ស៊ី គំរាមកំហែងការនាំចេញគ្រាប់ធញ្ញជាតិរបស់ប្រទេសនេះ ស្របពេលការវាយប្រយុទ្ធគ្នាកំពុងកក្រើកខ្លាំងនៅក្នុងភាគខាងកើត។
ឯកអគ្គរដ្ឋទូតរុស្ស៊ីប្រចាំនៅអង្គការសហប្រជាជាតិលោក Vasily Nebenzya បានដើរចេញពីកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃចន្ទ បន្ទាប់ពីប្រធានក្រុមប្រឹក្សាអឺរ៉ុបលោក Charles Michel បានចោទវិមានក្រឹមឡាំងពីបទយកការផ្គត់ផ្គង់ស្បៀងអាហារធ្វើជាអាវុធ នៅក្នុងការចោទប្រកាន់ដាក់គ្នាទៅវិញទៅមកយ៉ាងក្ដៅគគុក។ ប្រធានគោលនយោបាយកិច្ចការបរទេសរបស់សហភាពអឺរ៉ុបលោក Josep Borrell ក៏បានបង្ហាញការសង្ស័យផងដែរលើការអះអាងរបស់រុស្ស៊ីដែលថា ខ្លួនមិនបានរារាំងការនាំចេញគ្រាប់ធញ្ញជាតិ ដោយសំអាងដល់របាយការណ៍ជាច្រើនដែលថា ក្រុង Moscow បានវាយប្រហារលើទីតាំងស្តុកគ្រាប់ធញ្ញជាតិដ៏ធំបំផុតទី២ របស់អ៊ុយក្រែននៅក្នុងទីក្រុងកំពង់ផែ Mykolaiv ភាគខាងត្បូងកាលពីចុងសប្ដាហ៍មុន។
ទីបញ្ជាការយោធាភាគខាងត្បូងរបស់អ៊ុយក្រែនបាននិយាយថា រុស្ស៊ីបានបាញ់មីស៊ីលតម្រង់គោលដៅជាច្រើនគ្រាប់ចេញពីសមុទ្រខ្មៅឆ្ពោះទៅទីក្រុង Mykolaiv កាលពីថ្ងៃចន្ទ។ មីស៊ីល ២គ្រាប់ត្រូវបានបាញ់ធ្លាក់ ប៉ុន្តែមីស៊ីលផ្សេងទៀតបានត្រូវចំកំពង់ផែ និងឃ្លាំងស្តុកគ្រាប់ធញ្ញជាតិ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
