ភ្នំពេញ៖ ប្រធានក្រុមប្រឹក្សារាជធានីភ្នំពេញ កោតសរសើរគណៈអភិបាលរាជធានី លើកិច្ចការពារសន្តិសុខ សុវត្ថិភាពបានយ៉ាងល្អក្នុងដំណើរការយុទ្ធនាការឃោសនាបោះឆ្នោត ដោយជោគជ័យ និងគ្មានអំពើហិង្សា។

ការកោតសរសើររបស់ប្រធានក្រុមប្រឹក្សារាជធានីភ្នំពេញ បានធ្វើឡើងក្នុងកិច្ចប្រជុំសាមញ្ញ លើកទី៣៧ របស់ក្រុមប្រឹក្សារាជធានីភ្នំពេញអាណត្តិទី៣ នាថ្ងៃទី០៩ ខែមិថុនា ឆ្នាំ២០២២ នៅសាលារាជធានីភ្នំពេញ ។

ក្នុងឱកាសនោះ ឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ មានប្រសាសន៍បន្ដថា ក្រោមការដឹកនាំរបស់ឯកឧត្តម ឃួង ស្រេង អភិបាលរាជធានីភ្នំពេញ បានបំពេញ​ភារកិច្ចដោយ​ស្មារតីទទួលខុសត្រូវខ្ពស់ក្នុងកិច្ចការការពារសន្តិសុខ សុវត្ថិភាព ​និងសណ្តាប់ធ្នាប់ និងទប់ស្កាត់​សកម្មភាព​របស់អតីតបុគ្គលិក Naga World បានល្អ និងបានខិតខំប្រឹងប្រែង ក្នុងការកាត់​បន្ថយ​គ្រោះថ្នាក់​ចរាចរនៅតាមដងផ្លូវក្នុងខែឧសភា​ ឆ្នាំ២០២២ កន្លងមកនេះ បានល្អប្រសើរ។

ឯកឧត្តម ប្រធានក្រុមប្រឹក្សា បានបន្តថា ក្នុងខែឧសភា ឆ្នាំ២០២២កន្លងទៅឃើញថា មាន​កំណើន​បរិមាណនៃការប្រមូលសំរាម​ជាមធ្យមក្នុង១ថ្ងៃប្រមាណ ៣៧៩៥តោន ហើយត្រូវបាន​ក្រុមហ៊ុន​ប្រមូល និងដឹកជញ្ជូនបានល្អ និងទាន់ពេលវេលា។ ប៉ុន្តែទោះបីជាយ៉ាងណា​ក្តី​ប្រធាន​ក្រុមប្រឹក្សា​រាជធានីភ្នំពេញ ​បានស្នើសុំឱ្យបន្តការផ្សព្វផ្សាយអំពីការប្រមូល​វេចខ្ចប់ ការបញ្ចេញ​សំរាម​តាម​ពេលកំណត់​ដល់ខណ្ឌដែលមិនទាន់បានផ្សព្វផ្សាយ។

ក្នុងកិច្ចប្រជុំនោះ ឯកឧត្តម ឃួង ស្រេង អភិបាលរាជធានីភ្នំពេញ ក៏បានជម្រុញឱ្យស្ថាប័នពាក់ព័ន្ធ ពិសេស​មន្ទីរសុខាភិបាល និងមន្ទីរអប់រំយុវជន និងកីឡារាជធានីភ្នំពេញជម្រុញការចាក់វ៉ាក់សាំង​ជូនកុមារឱ្យបានគ្រប់ដូសទៅតាមការកំណត់របស់ក្រសួងសុខាភិបាល។

ឯកឧត្តម បន្តថា នៅលើពិភពលោក​ គេបានទទួលស្គាល់រួចហើយថា ​ប្រទេសកម្ពុជា ជាប្រទេស​មួយ​ដែលទទួលបានការចាក់វ៉ាក់សាំងល្អជាងគេ​ ដោយរហូតមកដល់ពេលនេះ មិនមាន​អ្នកឆ្លង​ជម្ងឺកូវីដ-១៩នោះទេ។​ ដូច្នេះការងារនេះត្រូវរួមគ្នាប្រឹងប្រែងបន្ថែមទៀត ព្រោះថាមនុស្សម្នាក់​មិនអាច​ទទួលការងារនេះបានជោគជ័យនោះទេ។

ក្នុងឱកាសនោះដែរ ឯកឧត្តម ឃួង ស្រេង ក៏បានលើកឡើងពីដើមឈើនៅក្នុងរាជធានីភ្នំពេញ ត្រូវ​តែអភិរក្សឱ្យបានល្អបំផុត ។ ចំពោះដើមឈើចាស់ៗ​ ប្រហោងក្នុង ​ដែលអាចបង្ក​ហានិភ័យ ដល់​ប្រជាពលរដ្ឋ ឬអ្នកដំណើរ ​គឺអាចស្នើសុំកាប់បានតែត្រូវដាំជំនួសមកវិញ សំដៅធ្វើ​យ៉ាង​ណា​ឱ្យរាជធានីភ្នំពេញ ​នៅរក្សាបានជាទីក្រុង​មាន​ពណ៌បៃតង ​និងបរិស្ថានល្អ៕