ភ្នំពេញ៖ ថ្ងៃទី៩ ខែមិថុនាឆ្នាំ ២០២២នេះ កម្ពុជាបានចាប់ផ្ដើមយុទ្ធនាការចាក់វ៉ាក់សាំងដូសទី៥។ ក្រៅពីការចាក់ជូនក្រុមមន្រ្តីគោលដៅ ក៏មានការចាក់វ៉ាក់សាំងដូសទី៥ ជូនប្រជាពលរដ្ឋ នៅតាមមណ្ឌលសុខភាព និងមន្ទីរពេទ្យបង្អែកផងដែរ។

កម្ពុជាបានចាប់ផ្ដើមយុទ្ធនាការចាក់វ៉ាក់សាំង ដូសទី៥ ជូនក្រុមមន្រ្តីគោលដៅ ក៏ដូចជា ប្រជា​ពលរដ្ឋទូទៅ ដែលមានគម្លាតពីការចាក់វ៉ាក់សាំងដូសទី៤ ក្នុងរយៈពេលយ៉ាងតិច៣ខែ។ ការចាក់វ៉ាក់សាំងដូសទី៥នេះ តាមការបញ្ជាក់របស់ក្រសួងសុខាភិបាល គឺចាប់ពីកុមារ​ដែល​មានអាយុ ១២ឆ្នាំឡើងទៅ។

ថ្ងៃចាប់ផ្ដើមដំបូងនេះ ប្រជាពលរដ្ឋមួយចំនួន ភាគច្រើនជាមនុស្សវ័យចាស់ចាប់ពី ៦០ឆ្នាំឡើងទៅ បានទៅទទួលការចាក់វ៉ាក់សាំងនៅទីតាំងមន្ទីរពេទ្យបង្អែកដង្កោ។ ការមកទទួលការចាក់​វ៉ាក់សាំង​នេះ គឺពួកគាត់បង្ហាញនូវភាពពេញចិត្ត ​និងបានថ្លែងអំណរគុណដល់រាជរដ្ឋាភិបាល ដែល​បាន​ស្វះស្វែងរកវ៉ាក់សាំងជូនប្រជាពលរដ្ឋគ្រប់រូប ដោយមិនគិតថ្លៃរហូតដល់ដូសទី ៥ ។

ថ្ងៃដំបូងនេះ សម្រាប់ទិដ្ឋភាពនៅមន្ទីរពេទ្យបង្អែកដង្កោ ​គឺពុំមានវត្តមាន​កកកុញ មនុស្សច្រើន​នោះទេ ខណៈថ្ងៃនេះជាថ្ងៃបំពេញកិច្ចការ ​ពុំមែនជាថ្ងៃឈប់សម្រាក។ ​ការចាក់ដូសទី ៥ តាមការបញ្ជាក់របស់ក្រុមគ្រូពេទ្យ ​គឺប្រើប្រាស់វ៉ាក់សាំងប្រភេទ​ AstraZeneca និងមានការចាក់​ជូនទាំងប្រជាពលរដ្ឋដែលប្រើប្រាស់កាតវ៉ាក់សាំង​របស់ក្រសួងការពារជាតិ និងកាត​វ៉ាក់សាំង​របស់ក្រសួងសុខាភិបាល។បច្ចុប្បន្នកម្ពុជា គ្រប់គ្រងបញ្ហាកូវីដ-១៩ ​បានយ៉ាងល្អប្រសើរ។ ភាពប្រសើរដោយសារក្នុងរយៈពេលប្រមាណ ១ខែមកនេះ​ គឺកម្ពុជាពុំករណីឆ្លងសូម្បីតែ ១ករណី។ លើសពីនេះ​ ការចាក់វ៉ាក់សាំងក៏សម្រេចបានផលជោគជ័យផងដែរ ​ដោយគិតត្រឹមថ្ងៃទី ៨ខែ មិថុនាឆ្នាំ ២០២២​ គឺសម្រេចបាន ៩៤,០៦ភាគរយ ​នៃប្រជាពលរដ្ឋសរុប ១៦លាននាក់៕

អត្ថបទ៖ គឹមហុក