ភ្នំពេញ៖ ជាថ្មីម្តងទៀត ប្រធានគណៈកម្មការចំពោះកចិ្ចចាក់វ៉ាក់សាំងបង្ការជំងឺកូវីដ-១៩ នៅថ្ងៃនេះ បានលើកឡើងថា ការចាក់វ៉ាក់សាំងកូវីដ-១៩ ជាច្រើនដូស មិនបង្កឱ្យមានផលប៉ះពាល់ដល់សុខភាពនោះទេ។

ក្នុងពេលចុះពិនិត្យទីតាំងចាក់វ៉ាក់សាំងបង្ការជំងឺកូវីដ-១៩ ដូសទី៥ ជូនមន្រ្តីជួរមុខនៅរាជធានីភ្នំពេញ នាថ្ងៃទី៩ ខែមិថុនានេះ លោកជំទាវវេជ្ជបណ្ឌិត ឱ វណ្ណឌីន ប្រធានគណៈកម្មការចំពោះកិច្ចចាក់ វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស ហៅកាត់ថា (គ.វ.ក-១៩) បានបញ្ជាក់ថា ការចាក់វ៉ាក់សាំងកូវីដ-១៩ ជាច្រើនដូស ជាពិសេសដូសទី៥ ដែលផ្តើមយុទ្ធនាការពីថ្ងៃនេះតទៅ មិនបង្កផលប៉ះពាល់ដល់សុខភាពនោះទេ ប៉ុន្តែត្រូវគោរព​ថេរវេលា​​កំណត់​ឱ្យបានច្បាស់លាស់។

លោកជំទាវ បានបញ្ជាក់ថា ដើម្បីធានានិរន្តរភាពការរស់នៅធម្មតាជាមួយជំងឺកូវីដ-១៩ ការចាក់ វ៉ាក់សាំងនៅតែសំខាន់ ហើយប្រជាពលរដ្ឋ ត្រូវបន្តប្រុងប្រយ័ត្នពីជំងឺកូវីដ-១៩​ បើទោះបីបច្ចុប្បន្ន កម្ពុជា លែងរកឃើញអ្នកឆ្លងជំងឺកូវីដ-១៩ថ្មីក្តី។

មន្រ្តីបម្រើការនៅស្ថាប័នព្រឹទ្ធសភា បានលើកឡើងដែរថា បន្ទាប់ពីចាក់វ៉ាក់សាំងដូសទី៥រួចរាល់ សុខភាពធម្មតាមិនបង្ករផលបះពាល់អ្វីនោះទេ ​ព្រមទាំងកាត់បន្ថយការភ័យខ្លាច ឆ្លងជំងឺកូវីដផងដែរ។

បច្ចុប្បន្នប្រទេសកម្ពុជា បើកដំណើរការសេដ្ឋកិច្ចធម្មតា ជាមួយវត្តមានជំងឺកូវីដ-១៩ ក្រោយពេល រាជរដ្ឋាភិបាល​ទទួលបានជោគជ័យ​ លើនយោបាយចាក់វ៉ាក់សាំងកូវីដ ស្រោចលើប្រជាពលរដ្ឋចាប់​ពី​ដូស មូលដ្ឋានរហូតដល់ដូសជំរុញ។

សម្រាប់ពលរដ្ឋមិនទាន់ទទួលបានការចាក់វ៉ាក់សាំងកូវីដ-១៩ ​ចាប់ពីដូសមូលដ្ឋាន រហូតដល់ដូស ជំរុញ​ អាចទៅទទួលការចាក់វ៉ាក់សាំងបាន ​នៅមូលដ្ឋានរស់នៅ ​ដែលរៀបចំដោយអាជ្ញាធរមូលដ្ឋាន ឬ អាចទៅចាក់វ៉ាក់សាំងនៅទីតាំងសុខាភិបាលសាធារណៈនៅទូទាំងប្រទេស ដោយភ្ជាប់ទៅ​ជា​មួយ​អត្តសញ្ញាណប័ណ្ណ កាតចាក់វ៉ាក់សាំង ​និងសំបុត្រកំណើតជាដើម៕

អត្ថបទ៖ ទូច សោភ័ណ