ភ្នំពេញ៖ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លើកឡើកថា គោលការណ៍គ្រឹះរបស់ អាយឡូ ផ្តោតលើយន្តការត្រីភាគី និងកិច្ចសន្ទនា សង្គម ដែលនឹងអាចដោះស្រាយនូវបញ្ហាចំពោះមុខ និងសម្រេច បាននូវបេសកកម្មអង្គការ អន្តរជាតិខាងការងារ ដើម្បីបន្តលើកកម្ពស់ការងារសមរម្យប្រកបដោយផលិតភាព សម្រាប់គ្រប់គ្នា។

ក្នុងឱកាសអញ្ជើញចូលរួមក្នុងសម័យប្រជុំលើកទី១១០ នៃ​សន្និសីទ​អន្តរជាតិខាងការងារ នៅទីក្រុងហ្សឺណែវ ប្រទេសស្វីស កាលពីថ្ងៃទី៨ មិថុនា ឆ្នាំ២០២២នេះ ឯកឧត្តមរដ្ឋមន្រ្តី មាន​ប្រសាសន៍​ថា អង្គការ អាយឡូ គឺជាដៃគូអភិវឌ្ឍន៍ដ៏សំខាន់​តាមរយៈការ​បន្តអនុវត្តកម្មវិធី​ជាច្រើន​ជាអាទិ៍៖ គម្រោងរោងចក្រកាន់តែប្រសើរនៅកម្ពុជា ដែលបានដើរតួនាទីយ៉ាងសំខាន់​ក្នុងការចូលរួម​លើក​កម្ពស់លក្ខខណ្ឌការងារ និងការអភិវឌ្ឍវិស័យ វាយនភណ្ឌ កាត់ដេរ និងផលិតស្បែកជើង​នៅកម្ពុជា។

ឯកឧត្តមបានបន្តថា កម្ពុជា បាននិងកំពុង អនុវត្តកម្មវិធីការងារសមរម្យសម្រាប់កម្ពុជាបានចំនួន ៥ដំណាក់កាល ចាប់តាំងពីឆ្នាំ២០០៥មក។ ក្នុងដំណាក់កាលទី៥ ឆ្នាំ២០១៩-២០២៣ ត្រូវបានរៀបចំ​ឡើងស្របពេលគម្រប់ខួប ៥០ឆ្នាំ ​នៃសមាជិកភាពរបស់កម្ពុជា​ ជាមួយនឹងអង្គការ អាយឡូ។

តាងនាមឲ្យរាជរដ្ឋាភិបាលកម្ពុជា ឯកឧត្តម បានគាំទ្រនូវអនុសាសន៍ដែលបានលើកឡើង​ក្នុង​របាយការណ៍របស់​ ឯកឧត្តម Guy Ryder អគ្គនាយកអង្គការ អាយឡូ ស្តីពី“វិបត្តិការផ្លាស់ប្តូររចនា​សម្ព័ន្ធការងារ និងអនាគតនៃ ការងារ” និងខ្លឹមសារនៃសេចក្តីព្រាងរបាយការណ៍ស្តីពី “ការងារសមរម្យ សេដ្ឋកិច្ច សង្គម និងសាមគ្គីភាព” ក៏ដូចជា “ការអំពាវនាវជាសកល ដើម្បី​ចាត់វិធានការ​សម្រាប់ការស្តារឡើងវិញពីវិបត្តិកូវីដ-១៩ ​ដោយផ្តោតលើកត្តាមនុស្សជា ស្នូល ប្រកបដោយបរិយាប័ន្ន ចីរភាព ​និងភាពធន់” ដែលនឹងរួមចំណែកសម្រេចបាននូវគោលដៅ​រួមនៃ​របៀបវារៈ ឆ្នាំ២០៣០ របស់អង្គការសហប្រជាជាតិ ​ដើម្បីការអភិវឌ្ឍប្រកបដោយចីរភាព និង​អាណត្តិជាប្រវត្តិសាស្ត្ររបស់ អង្គការ ក្នុងការសម្រេចបាននូវយុត្តិធម៌សង្គម និង​ការងារ​សង្គមសម្រាប់គ្រប់គ្នា៕ អត្ថបទ៖ ឈិត បូរ៉ាវី