​ស៊ូដង់៖ អង្គការសហប្រជាជាតិ​បាន​និយាយថា កិច្ចចរចា​សំដៅ​បញ្ចប់​ភាពជាប់គាំង​ផ្នែក​ន​យោបាយ​ ដែលកំពុង​បន្តរបស់​ប្រទេស​ស៊ូដង់​បានចាប់ផ្តើម​កាលពី​ថ្ងៃ​ពុធ ទោះបីជា​សម្ព័ន្ធគាំទ្រ​លទ្ធិប្រជាធិបតេយ្យធំ​របស់​ប្រទេស​នេះ​ធ្វើពហិការ​ ជុំវិញ​ការបន្ត​ការបង្ក្រាប​របស់​នគរ​បាល​ទៅលើ​ក្រុមអ្នកតវ៉ា​ ប្រឆាំង​រដ្ឋប្រហារ​យោធា​កាលពី​ខែតុលា​ឆ្នាំមុន​ក៏ដោយ​។​

​កិច្ចខិតខំ​ស្វែងរក​សន្តិភាព​រួមគ្នា​នេះ​ត្រូវបាន​សម្របសម្រួល ​ដោយ​បេសកកម្ម​នយោបាយរបស់អង្គការសហប្រជាជាតិ​នៅ​ប្រទេស​ស៊ូដង់ សហភាព​អាហ្វ្រិក និង​អាជ្ញាធរ​អន្តររដ្ឋាភិបាល​ក្នុងការអភិវឌ្ឍន៍​ក្រុម​តំបន់​អាហ្វ្រិក​ខាងកើត​ទាំង​ប្រាំបី​ប្រទេស។​ ​កិច្ចខិតខំ​ប្រឹងប្រែង​នេះមាន​គោលបំណង​នាំយក​ឧ​ត្ត​ម​សេនីយ៍ ក្រុម​អ្នកនយោបាយ និង​ក្រុមអ្នកតវ៉ា​ចូលមក​តុ​ចរចា​។ ការដណ្តើមយក​ការគ្រប់គ្រង​របស់​យោធា​ បានធ្វើឱ្យ​ជាប់គាំង​ការផ្លាស់ប្តូរ​បែប​លទ្ធិប្រជាធិបតេយ្យ​ដ៏ផុយស្រួយ​របស់​ប្រទេស​ស៊ូដង់ ហើយ​បានធ្វើឱ្យ​ប្រទេសអាហ្វ្រិក​ខាងកើតមួយ​នេះ​ធ្លាក់​ចូលទៅក្នុងភាពចលាចល​។​ ​ប្រទេស​ស៊ូដង់​បាននឹងកំពុង​ផ្លាស់ប្តូរ​ទៅរក​លទ្ធិប្រជាធិបតេយ្យ ​បន្ទាប់ពី​ការគាបសង្កត់​ជិត 3ទសវត្សរ៍ និង​នៅឯ​កោ​ពី​អន្តរជាតិ ​ក្រោម​ការគ្រប់គ្រង​រប​ស់បុ​រស​ខ្លាំង​ដែល​គាំទ្រ​អ៊ីស្លាម​និយម​លោក Omar al-Bashir​។

ការបះបោរ​ខ្លាំង​មួយ​បាន​ជំរុញ​ឱ្យ​យោធា​បណ្តេញ​លោក al-Bashir កាលពី​ខែមេសា ឆ្នាំ2019​។ ការចរចា​កាលពី​ថ្ងៃ​ពុធ​បានចាប់ផ្តើម​ជាមួយនឹង​កិច្ចប្រជុំ​បច្ចេកទេស​នៅ​ទីក្រុង Khartoum រដ្ឋធានី​ប្រទេស​ស៊ូដង់ ដែលមាន​ការចូលរួម​ពី​យោធា និង​ជន​ស៊ីវិល​។​ ​វា​បាន​ធ្វើឡើង​បន្ទាប់ពី​ការពិភាក្សា​ដោយឡែក​ពីគ្នា​ជាច្រើន​ខែ​ ជាមួយនឹង​ក្រុម​ជាច្រើន​រួមមាន​ទាំងយោធា និង​ចលនា​គាំទ្រ​លទ្ធិប្រជាធិបតេយ្យ​។​ ​បេសកជន​របស់​អង្គការសហប្រជាជាតិ​ប្រចាំ​ប្រទេស​ស៊ូដង់ លោក Volker Perthes បាន​និយាយថា ដំណើរការ​នេះ​នឹង​ពិភាក្សា​អំពី​កម្មវិធី​អន្តរកាល រួមទាំង​ការតែងតាំង​នាយករដ្ឋមន្ត្រី​ស៊ីវិល និង​ការរៀបចំ​សម្រាប់​ពង្រាង​រដ្ឋធម្មនុញ្ញ​អចិន្ត្រៃយ៍ និង​ការបោះឆ្នោត៕

អត្ថបទ៖ ប៊ុនថន