​បាល់ទាត់៖ ​ក្លិប​បាល់ទាត់​ចំនួន ៤ ​នៅ​ក្របខណ្ឌ​លី​គ​ទី៤ ​នៅ​ប្រទេស​អាហ្វ្រិក​ខាងត្បូងត្រូវ​ជាប់​ពិន័យ​ពេញ​មួយជីវិត​ ក្រោយពាក់ព័ន្ធ​នឹង​អំពើ​ពុក​រលួយ​រៀបចំ​លទ្ធផល​ប្រកួត​ ជា​ថ្នូរ​ឱ្យ​ក្លិប​មួយ​ឈ្នះ​ជើងឯក​។ ​​លទ្ធផល​ការប្រកួត​មិនគួរ​ឱ្យ​ជឿ​មួយចំនួន​បានកើត​ឡើង​កាលពី​ចុងខែ​មុន ក្រុមបាល់ទាត់ Matiyasi FC និង Shivulani Dangerous Tiger ត្រូវ​ប្រជែង​គ្នា​ដណ្តើម​ជើងឯក​នៅ​សប្តាហ៍​ចុងក្រោយ​។

​​Shivulani នាំមុខគេ​ក្នុង​តារាង ៣ ពិន្ទុ និង​មាន​គ្រាប់​បាល់​ចំណេញ ១៦ គ្រាប់​មុន​ឈានដល់​សប្តាហ៍​ចុងក្រោយ ពោលគឺ​ពួកគេ​ត្រូវការ​ជ័យជំនះ​ប្រកួត​ចុងក្រោយ​ដើម្បី​ធានា​ជើងឯក​។ ​​Shivulani ពិតជា​រក​ជ័យជំនះ​បាន​មែន​ដោយ​យកឈ្នះ​ក្រុម Kotoko Happy Boys ៣១-១​។ ​​រឿង​មិន​គួរឱ្យ​ជឿ​នោះ​គឺក្រុមបាល់ទាត់ Matiyasi បាន​យកឈ្នះ Nsami Mighty Birds ដល់​ទៅ ៥៩-១​។ ​​ក្រោយ​ការស៊ើបអង្កេត​ឃើញថា Matiyasi និង Nsami ចង់​រារាំង​មិនឱ្យ Shivulani ឈ្នះ​ជើងឯក​។ បន្ទាប់ពី​បាន​លឺថា Matiyasi កំពុង​នាំមុខ ២២-០ នៅ​តង់​ទីមួយ Shivulani បាន​ឃុបឃិត​គ្នា​ដក​កីឡាករ Kotoko Happy Boys ចេញពី​ទីលាន​។ កីឡាករ​ដែល​បានចេញ​នោះនិយាយថា ​ពួកគេ​នឿយហត់ ធ្វើ​ឱ្យនៅ​ក្រុម​របស់ខ្លួន​នៅសល់​កីឡាករ​តែ ​៧​នាក់​ប៉ុណ្ណោះ​។​ ​នៅក្នុង​ការប្រកួត​រប​ស់ Matiyasi វិញ​អាជ្ញាកណ្តាល​បានផ្តល់​កាត​ក្រហម​ដល់​កីឡាករ​មួយចំនួន ដូច្នេះហើយ Nsami នៅសល់​កីឡាករ​តែ​ប្រាំពីរ​នាក់​។​

​ក្រោយមក Nsami Mighty Birds ទោះបី​ជាមាន​កីឡាករ​តែ ៧នាក់​ក៏ដោយ បែ​ជា​បាន​ស៊ុត​បញ្ចូល​ទី​ខ្លួនឯង ៤១គ្រាប់ក្នុងអំឡុងពេល​នៃ​ការបរាជ័យ ៥៩-១ របស់​ពួកគេ​។​ ​កាលពី​ខែមីនា​ក្រុម​ទាំងអស់នេះ​បាន​ប្រកួត​ជើង​ទី១ ដោយ​លទ្ធផល​ខុសគ្នា​មេឃ និង​ដី ពោលគឺ Matiyasi បាន​យកឈ្នះ Nsami Mighty Birds ក្នុង​លទ្ធផល ២-១ ក្នុងការ​ប្រកួត​ដំបូង ខណៈដែល Shivulani Dangerous Tigers បាន​ស្មើ ២-២ ជាមួយ Kotoko Happy Boys។​ ​​ក្លិប​បាល់ទាត់ Gawula Classic ដែលជា​ក្រុម​លេខ ៤ ត្រូវបាន​ប្រកាសថា​ជា​ជើងឯក ​បន្ទាប់ពី​ក្រុម​កំពូល​ទាំងបី​ត្រូវ​ពិន័យ​។ ​មន្ត្រី​ក្លិប​ដែល​ពាក់ព័ន្ធ​បានទទួល​ការពិន័យ​ចន្លោះ​ពី ៥ ទៅ ៨ រដូវ​កាល ខណៈ​មន្ត្រី​អាជ្ញាកណ្តាល​ដឹកនាំ​ការប្រកួត​ត្រូវបាន​ពិន័យ​ដល់​ទៅ ១០ រដូវ​កាល​។​ ​កីឡាករ​ដែល​ចូលរួម​ប្រកួត​នឹង​ដឹង​ពី​ទំហំ​ទណ្ឌកម្ម​របស់​ពួកគេនៅ​ប៉ុន្មាន​ថ្ងៃ​ខាងមុខនេះ ជាមួយនឹង​ការដាក់ទណ្ឌកម្ម​យ៉ាងធ្ងន់ធ្ង​រ​ត្រូវបាន​គេ​រំពឹងទុក​៕

​អត្ថបទ​៖​នាង សុភា​វុ​ធ