ភ្នំពេញ៖ គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិ សម្រេចបានសមិទ្ធផលជាច្រើន ក្នុងរយៈពេលប្រមាណ ៥ឆ្នាំមកនេះ។

នេះជាការបញ្ជាក់របស់ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ក្នុងឱកាសចូលរួមបើកសិក្ខាសាលា ស្ដីពីឧត្តមានុវត្តន៍ នៃការអនុវត្តគម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិ។

ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា លើកឡើងថា គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិ ដែលអនុវត្តបានរយៈពេលជិត ៥ឆ្នាំ និងឈានទៅការបិទបញ្ចប់គម្រោងក្នុងពេលឆាប់ៗខាងមុខ គឺសម្រេចបានសមិទ្ធផលវិជ្ជមានជាច្រើន។

ផលវិជ្ជមានទី ១គឺ ការបង្កើនឱកាសសិក្សានៅមធ្យមសិក្សាទុតិយភូមិ ពិសេសសម្រាប់សិស្សនៅតំបន់ជួបការលំបាក ក្នុងខេត្តគោលដៅទាំង៧។

អត្រារួមនៃការសិក្សាបានកើនដល់ ៣៧.៣ភាគរយ, អត្រាត្រួតថ្នាក់បានថយមកនៅត្រឹម ១.៨ភាគរយ។ ផលវិជ្ជមានទី ២ គឺ សិស្សថ្នាក់ទី១២ ទទួលបាននិទ្ទេស A ក្នុងការប្រឡងបាក់ឌុបឆ្នាំ២០២២ មានចំនួន២៥៦ នាក់ ទោះក្នុងបដិបទកូវីដ១៩ ដែលសាលាត្រូវអនុវត្តការបង្រៀនពីចម្ងាយ, ការបង្រៀនអនឡាញ,ការបង្រៀននិងរៀនជាបណ្ដុំ។

ផលជះវិជ្ជមានទី ៣ គឺ គណៈគ្រប់គ្រង នាយក នាយករង នៅសាលាមធ្យមសិក្សាធនធាន បានទទួលការបណ្តុះបណ្តាលអំពីការគ្រប់គ្រងតាមសាលារៀន, ការអនុវត្តនិងបំពេញស្តង់ដាសាលាមធ្យមសិក្សាធនធាន និងការគ្រប់គ្រងអគារធនធាននិងបណ្ណាល័យជាដើម។

ចំពោះចំណុចវិជ្ជមានទី៤ ដែលទទួលបានពី គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិ គឺ សាលាមធ្យមសិក្សាធនធានទាំង ៥០ និងសាលាបណ្ដាញ បានចូលរួមអនុវត្តសៀវភៅប្រតិបត្តិស្ដីពី មូលនិធិកែលម្អសាលារៀន (SIF) ក្នុងគោលដៅគ្រប់គ្រងនិងប្រើប្រាស់រាល់ធនធាន ដែលបានផ្តល់ទៅសាលារៀនប្រកបដោយប្រសិទ្ធភាព តម្លាភាព និងលទ្ធផល។

គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិ រៀបចំឡើង ក្នុងគោលដៅរួមចំណែកក្នុងការអនុវត្តកំណែទម្រង់វិស័យអប់រំ ដោយផ្តោតលើការអភិវឌ្ឍសមត្ថភាពគ្រូមុខវិជ្ជាវិទ្យាសាស្ត្រ គណិតវិទ្យា និងបច្ចេកវិទ្យាព័ត៌មាន, ការកែលម្អលទ្ធផលសិក្សារបស់សិស្សនោមធ្យមសិក្សាទុតិយភូមិ ជាពិសេសជ្រើសរើសមុខវិជ្ជាវិទ្យាសាស្រ្ត កែលម្អរកម្មវិធីសិក្សានៅមធ្យមសិក្សាទុតិយភូមិឱ្យមានកម្រិតស្តង់ដារតំបន់ និងពង្រឹងដំណើរការសាលាធនធានទាំង ៥០។ អត្ថបទ៖ គឹមហុក