​បាល់ទាត់៖ សហព័ន្ធ​កីឡាបាល់ទាត់​អាស៊ីអាគ្នេយ៍​ (AFF) បានធ្វើការ​ចាប់ឆ្នោត​ប្រកួត​ជើងឯក​យុវជន ២​កម្រិត​អាយុ គឺ​ពាន​យុវជន​អាយុ​ក្រោម ១៦​ឆ្នាំ និង​អាយុ​ក្រោម ១៩​ឆ្នាំ រួមជាមួយ​ពានរង្វាន់​យុវតី​អាយុ​ក្រោម ១៨​ឆ្នាំប្រចាំ​តំបន់​អាស៊ីអាគ្នេយ៍ឆ្នាំ​២០២២ រួចរាល់​ហើយកាលពី​ថ្ងៃទី​០៩ ខែមិថុនា​ម្សិលមិញ។​

​ជា​លទ្ធផល​ចាប់ឆ្នោត​សម្រាប់​ពានរង្វាន់​យុវជន​ជើងឯក​អាស៊ីអាគ្នេយ៍​អាយុ​ក្រោម ១៦​ឆ្នាំ​ AFF U16 Boys Championship 2022 ​កម្ពុជា​ស្ថិតក្នុង​ពូ​ល​ C ​ជាមួយ​ក្រុមយុវជន​អូស្ដ្រាលី ម៉ាឡេស៊ី និង​មី​យ៉ាន់​ម៉ា។ រីឯ​ពូ​ល​ A ​គឺមាន​ឥណ្ឌូនេស៊ី វៀតណាម សិង្ហ​បុរី និង​ហ្វីលីពីន និង​ពូ​ល​ B ​មាន​ថៃ ទី​ម័​រ​ខាងកើត ឡាវ និង​ប្រ៊ុយណេ។ ការប្រកួត​នេះ គ្រោង​ធ្វើឡើង​ពីថ្ងៃ​ទី​៣១ ខែកក្កដាដល់​ថ្ងៃទី​១៣ ខែសីហា ឆ្នាំ​២០២២។​ ​រីឯ​ពានរង្វាន់​យុវជន​ជើងឯក​អាស៊ីអាគ្នេយ៍​អាយុ​ក្រោម ១៩​ឆ្នាំ​ AFF U19 Boys Championship 2022 ​កម្ពុជា​ស្ថិតក្នុង​ពូ​ល​ B ​ជាមួយ​ម៉ាឡេស៊ី ឡាវ ទី​ម័​រ​ខាងកើត និង​សិង្ហ​បុរី។ ចំពោះ​ពូ​ល​ A ​គឺមាន​ឥណ្ឌូនេស៊ី មី​យ៉ាន់​ម៉ា វៀតណាម ថៃ ប្រ៊ុយណេ និង​ហ្វីលីពីន។ ពាន​នេះគ្រោង​ធ្វើការ​ប្រកួត​ពីថ្ងៃ​ទី​០២ ដល់​ថ្ងៃទី​១៥ ខែកក្កដា ឆ្នាំ​២០២២។​

​ចំណែក​ពានរង្វាន់​យុវតី​អាយុ​ក្រោម ១៨​ឆ្នាំ​ជើងឯក​អាស៊ីអាគ្នេយ៍​ AFF U18 Women’s Championship 2022 ​វិញ កម្ពុជាស្ថិតក្នុង​ពូ​ល​ A ​ជាមួយ​វៀតណាម ថៃ សិង្ហ​បុរី និង​ឥណ្ឌូនេស៊ី។ ឯ​ពូ​ល​ B ​មាន​អូស្ដ្រាលី មី​យ៉ាន់​ម៉ា ម៉ាឡេស៊ី និង​ហ្វីលីពីន។ ការប្រកួត​នេះគ្រោង​ធ្វើឡើង​ពីថ្ងៃ​ទី​២២ ខែកក្កដាដល់​ថ្ងៃទី​០៤ ខែសីហា ឆ្នាំ​២០២២។​ ​សូមបញ្ជាក់ថា ការប្រកួត​ពានរង្វាន់​យុវជន និង​យុវតី​អាស៊ីអាគ្នេយ៍​ទាំង ៣​ព្រឹត្តិការណ៍​នេះនឹងធ្វើ​ឡើង​នៅ​ប្រទេស​ឥណ្ឌូនេស៊ី​ដូចគ្នា ៕

​អត្ថបទ៖ លី ឈុន​ឡា