ស៊ីហ្គេម៖ ឯកឧត្តមបណ្ឌិត ថោង ខុន អនុប្រធានអចិន្ត្រៃយ៍ នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ (CAMSOC) បានជំរុញគណៈកម្មការជំនាញទាំងអស់ ត្រូវបញ្ចប់គម្រោងផែនការគ្រប់ទម្រង់របស់ខ្លួនឲ្យបានរួចរាល់ត្រឹមចុងឆ្នាំ២០២២ នេះ ដើម្បីធានាបាននូវភាពរួចរាល់សម្រាប់ត្រៀមធ្វើម្ចាស់ផ្ទះ ព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជានាឆ្នាំ២០២៣ ខាងមុខ។
នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការ CAMSOC ក្រោយបញ្ចប់កិច្ចប្រជុំគណៈអចិន្ដ្រៃយ៍ ដែលដឹកនាំដោយឯកឧត្តមរដ្ឋមន្ដ្រី ថោង ខុន ដោយមានការចូលរួមពីគណៈកម្មការជំនាញទាំង ១៤ បូករួមទាំងគណៈកម្មាធិការជាតិប៉ារ៉ាឡាំពិកកម្ពុជា នៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីថ្ងៃទី០៩ ខែមិថុនា ឆ្នាំ២០២២។ ឯកឧត្តមអគ្គលេខាធិការបានគូសបញ្ជាក់ថា កិច្ចប្រជុំនេះឯកឧត្តមបណ្ឌិត ថោង ខុន បានជំរុញគ្រប់សកម្មភាពរបស់គណៈកម្មការជំនាញនីមួយៗ ព្រោះឆ្នាំ២០២២ នេះគឺជាឆ្នាំដំណើរការស៊ីហ្គេមឆ្នាំ២០២៣។ ដូច្នេះគម្រោងផែនការគ្រប់ទម្រង់ត្រូវឲ្យរួចរាល់ទាំងស្រុង រាល់ការរៀបចំ ការផ្គត់ផ្គង់ និងការងារពាក់ព័ន្ធនឹងសេវាផ្សេងៗក៏ត្រូវរួចរាល់ដូចគ្នា ដើម្បីបង្ហាញពីការត្រៀមលក្ខណៈរួចរាល់របស់កម្ពុជា ក្នុងនាមម្ចាស់ផ្ទះព្រឹត្តិការណ៍កីឡាប្រចាំតំបន់នេះ។ ជារួមលទ្ធផលនៃកិច្ចប្រជុំនេះ ឯកឧត្តមបណ្ឌិត ថោង ខុន រួមទាំងអង្គប្រជុំទាំងមូលទទួលបាននូវភាពកក់ក្តៅ ដោយសារតែគណៈកម្មការជំនាញនីមួយៗបានបង្ហាញនូវផែនការច្បាស់លាស់ ហើយដំណើរការវឌ្ឍនភាពនៃគណៈកម្មការជំនាញទាំងនោះមានលក្ខណៈវិជ្ជមានល្អប្រសើរ ក្នុងដំណើរត្រៀមឆ្ពោះទៅធ្វើម្ចាស់ផ្ទះស៊ីហ្គេមឆ្នាំ២០២៣។
រីឯក្តីកង្វល់នានាក៏ត្រូវបានដោះស្រាយបានមួយចំនួនធំជាបន្តបន្ទាប់ រាប់បញ្ជូលទាំងក្តីកង្វល់នៃគម្រោងផែនការហូបចុក ស្នាក់នៅ និងការសាងសង់ភូមិកីឡាជាដើម។ សូមបញ្ជាក់ថា កិច្ចប្រជុំគណៈអចិន្ដ្រៃយ៍ CAMSOC ត្រូវបានធ្វើឡើងរៀងរាល់សប្ដាហ៍ ក្រោមការចង្អុលបង្ហាញរបស់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងប្រធាន CAMSOC ដើម្បីតាមដានវឌ្ឍនភាពការងាររបស់គ្រប់ភាគីពាក់ព័ន្ធ ពិសេសគណៈកម្មការជំនាញនីមួយៗ ដើម្បីធានាបាននូវដំណើរការរលូនក្នុងការអនុវត្តសកម្មភាពការងារ ក្នុងដំណើរឆ្ពោះទៅរកភាពជោគជ័យក្នុងព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេមឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
