វាយកូនឃ្លីលើតុ៖ សហព័ន្ធកីឡាវាយកូនឃ្លីលើតុកម្ពុជានឹងបញ្ជូនប្រតិភូ អាជ្ញាកណ្ដាល-ចៅក្រម គ្រូបង្វឹក និងកីឡាករ-កីឡាការិនីវ័យក្មេងជាច្រើនរូបចូលរួមការបោះជំរំហ្វឹកហាត់ និងការប្រកួតជម្រើសជើងឯកយុវជនអាស៊ីអាគ្នេយ៍នៅប្រទេសថៃចាប់ពីថ្ងៃទី១២ ដល់ថ្ងៃទី២៩ ខែមិថុនា ឆ្នាំ២០២២ សប្ដាហ៍ក្រោយ។
នៅល្ងាចថ្ងៃទី០៩ ខែមិថុនា មុនចាកចេញពីមាតុភូមិ ឯកឧត្តម គៀត ច័ន្ទថារិទ្ធ អគ្គនាយកអន្តោប្រវេសន៍នៃក្រសួងមហាផ្ទៃ និងប្រធានសហព័ន្ធ បានជួបសំណេះសំណាលជាមួយគណៈប្រតិភូ គ្រូបង្វឹក អាជ្ញាកណ្តាល ចៅក្រម និងកីឡាករ-កីឡាការិនីនៅពហុកីឡដ្ឋានជាតិអូឡាំពិក ហើយឯកឧត្តមបានផ្ដាំផ្ញើ និងលើកទឹកចិត្តឲ្យកីឡាករ-កីឡាការិនីវ័យក្មេងទាំងអស់ត្រូវខិតខំហ្វឹកហាត់ និងប្រកួត ដើម្បីទទួលបាននូវគុណផលល្អប្រសើរ សម្រាប់ត្រៀមស៊ីហ្គេមឆ្នាំ២០២៣ និងការប្រកួតអន្ដរជាតិផ្សេងៗនាថ្ងៃអនាគត។ លោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា បានបញ្ជាក់ថា បេសកកម្មនេះមានប្រតិភូ គ្រូបង្វឹក ចៅក្រម និងកីឡាករ-កីឡាការិនី ១៥រូបចូលរួមជុំរុំហ្វឹកហាត់អាយុក្រោម ១៥ឆ្នាំ និងអាយុក្រោម ១៩ឆ្នាំអាស៊ីអាគ្នេយ៍ឆ្នាំ២០២២ និងការប្រកួតជម្រើសជើងឯកយុវជនអាស៊ីអាគ្នេយ៍ លើកទី២៦ ចាប់ពីថ្ងៃទី១៤ ដល់ថ្ងៃទី២៣ ខែមិថុនា ហើយមានកីឡាករ-កីឡាការិនីវ័យក្មេង ៥រូបត្រូវចូលរួមប្រកួតជើងឯកអាស៊ីអាគ្នេយ៍លើកទី១២ ចាប់ពីថ្ងៃទី២២ ដល់ថ្ងៃទី២៩ ខែមិថុនា ឆ្នាំ២០២២។
តាមរយៈការចូលរួមជាលក្ខណៈអន្ដរជាតិនេះ លោករំពឹងថានឹងទទួលបានលទ្ធផលល្អ ទាំងអាយុក្រោម ១៥ឆ្នាំ និងអាយុក្រោម ១៩ឆ្នាំ ដោយសារការប្រកួតសិស្សបឋមលោកសំឡឹងឃើញ កីឡាករវ័យក្មេងមានសមត្ថភាពល្អគួរទទួលយកបានព្រោះពួកគេមានឆន្ទៈល្អ ហើយគោលបំណងសហព័ន្ធឲ្យចង់កីឡាករវ័យក្មេងចូលរួមការប្រកួតឲ្យបានច្រើន ដែលជាបទសោធន៍ដ៏ធំសម្រាប់ពួកគេ។ សូមបញ្ជាក់ថា ក្នុងការចាកចេញទៅបោះជំរំហ្វឹកហាត់ និងប្រកួតនៅប្រទេសថៃនេះ ប្រធានសហព័ន្ធឯកឧត្តម គៀត ច័ន្ទថារិទ្ធ បានឧបត្ថម្ភកីឡាករ-កីឡាការិនីវ័យក្មេងក្នុងម្នាក់ៗចំនួន ១០០ដុល្លារ ប្រតិភូ គ្រូបង្វឹក និងចៅក្រម និងក្រុមកីឡាករ-កីឡារិនីយុវជនក្នុងម្នាក់ៗចំនួន ២០០ដុល្លារ។ រីឯលោកបណ្ឌិត ដួង ហេង អនុប្រធានសហព័ន្ធក៏បានឧបត្ថម្ភប្រតិភូ គ្រូបង្វឹក ចៅក្រម និងក្រុមកីឡាករទាំងអស់ ២៥នាក់ក្នុងម្នាក់ៗ ២០ម៉ឺនរៀលបន្ថែមផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
