កំពង់ស្ពឺ៖ វិស័យឯកជននានា បានបន្តនាំយកវិភាគទាន ជាសប្បុរសធម៌ ចូលរួមជាមួយអាជ្ញាធរមីនកម្ពុជា អនុវត្តលើកការងារសកម្មភាពបោសសំអាតមីន នៅក្នុងខេត្តកំពង់ស្ពឺ ដើម្បីរំដោះដីឱ្យមានសុវត្ថិភាព និងប្រគល់ជូនប្រជាពលរដ្ឋ សម្រាប់ប្រកបរបរដាំដំណាំកសិកម្មផ្សេងៗ ។

ក្នុងពិធីប្រគល់ និងទទួលវិភាគទានសប្បុរសធម៌ គាំទ្រការងារបោសសំអាតមីន នៅថ្ងៃទី១០ ខែមិថុនា ឆ្នាំ២០២២ ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនកម្ពុជា មាន​ប្រសាសន៍ថា សម្រាប់ថវិកាជាវិភាគទាន ទទួលបានពីសប្បុរសជននេះ នឹងយកទៅប្រើប្រាស់ ក្នុងការងារបោសសំអាតមីន នៅក្នុងភូមវាល ឃុំស្រង់ ស្រុកគង់ពិសី លើផ្ទៃដីប្រមាណ ៥ហិកតា ជាអតីតសមរភូមិ ក្នុងទសវត្សឆ្នាំ៨០ ។

ឯកឧត្តម បានបន្តថា ចំពោះវិភាគទានប្រគល់ដល់អាជ្ញាធរមីននេះ ទទួលបានពីអង្គភាពខ្មែរថាមស៍ ហើយប្រតិបត្តិការបោសសំអាតនេះ ធ្វើឡើងតាមរយៈកងទ័ពមួកខៀវ ដែលមានបទពិសោធន៍ធ្លាប់​ទៅបំពេញបេសកកម្មនៅក្រៅប្រទេស ប្រើប្រាស់ពេលវេលាបោសសំអាតជិត ២០ថ្ងៃ ប៉ុន្តែ​តំបន់នោះ ភូមិសាស្ត្រមិនសូវងាយស្រួលនោះទេ ​គ្រាប់រំសេវមានការចលត ព្រោះជារដូវ ភ្លៀង មាន​ទឹកជំនន់ និងស្ថិតនៅជម្រៅជ្រៅ ​ហើយសូមថ្លែងអំណរគុណចំពោះការចូលរួមនេះ ។

លោក Mohan Bandam ប្រធានអង្គភាពខ្មែរថាមស៍ លើកឡើងថា មានសេចក្តីសប្បាយ​រីក​រាយ​ណាស់ ​ដែលបានចូលរួមវិភាគទានជាមួយអាជ្ញាធរមីន ក្នុងការងារបោសសម្អាតមីន​មនុស្សធម៌​ដែលជាជ្រុងមួយតូចនៅកម្ពុជា ដើម្បីផ្តល់ដីមានសុវត្ថិភាព និងកាត់បន្ថយគ្រោះថ្នាក់​របស់​ប្រជាពលរដ្ឋភូមិវាល ហើយវិភាគទាននេះ ជាការចូលរួមចំណែកដោយផ្ទាល់ក្រុមការងាររបស់​អង្គភាពទាំងមូល។

លោក បានបន្តថា ​នឹងបន្តចាប់ផ្តើមរៃអង្គាសមូលនិធិបន្ថែមទៀតពីសប្បុរសជន ​និងបណ្តាវិស័យ​ឯកជននានា​ តាមរយៈការរៀបចំកម្មវិធីសប្បុរសធម៌រហូតដល់ខែធ្នូ​ ឆ្នាំ២០២២នេះ ដើម្បី​ចូលរួម​ជាមួយរាជរដ្ឋាភិបាលកម្ពុជា​ ដល់ការងារបោសសម្អាតមីន ។

ឯកឧត្តម លី ធុជ បានបញ្ជាក់ថា រយៈពេលជាង ៣០ឆ្នាំនេះ ​រាជរដ្ឋាភិបាលកម្ពុជា និងមានការ​ចូលរួមពីគ្រប់ភាគីពាក់ព័ន្ធ ​បានសម្រេចនូវសមិទ្ធផលយ៉ាងច្រើនដោយរំដោះផ្ទៃដី​ បានជាង ២ ៣៧៨ គីឡូម៉ែត្រក្រឡា​ និងផ្តល់ដីមាន​សុវត្ថិភាព​ជូនដល់ប្រជាពលរដ្ឋជាអ្នកទទួលផលបានជាង ៧លាននាក់ ៕ អត្ថបទ បាន សុខរិទ្ធិ