ភ្នំពេញ៖ ជាថ្មីម្តងទៀត មន្រ្តីជំនាញនៃក្រសួងសុខាភិបាល បានក្រើនរម្លឹកដល់ប្រជាពលរដ្ឋសង្ស័យមានជំងឺពងបែកជើង ដៃ និងមាត់ រួសរាន់ទៅជួបគ្រូពេទ្យ ប្រសិនបើមានអាការៈពិបាកដកដង្ហើម និងខ្សោយកំលាំងខ្លាំង។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បាន​ប្រាប់BTVឱ្យដឹងថា បច្ចុប្បន្នក្រសួងសុខាភិបាល បាន​រក​ឃើញ​ជា​រប៉េះរប៉ោះ​នៃ​ជំងឺ​ពងបែក​នៅដៃ ជើង និងក្នុងមាត់ ​លើកុមារតាមបណ្តាខេត្តមួយចំនួន។ ជំងឺពងបែកនៅដៃជើង ​និងក្នុងមាត់ គឺជាជំងឺឆ្លងដែលបង្កឡើងដោយវីរុស ច្រើនកើតមានចំពោះទារក និងកុមារ។ ជំងឺនេះកើតមាននៅក្នុងប្រទេសកម្ពុជា ​តាំងពីឆ្នាំ២០១២ ​ហើយក៏ជាជំងឺដែលកើតមាននៅប្រទេស​ជាច្រើនលើពិភពលោកផងដែរ។ ក្រៅពីនេះ លោកជំទាវ បានក្រើនរម្លឹកដល់ប្រជាពលរដ្ឋសង្ស័យ​មាន​ជំងឺពង​បែកដៃ ជើង ​និងមាត់ ​សូមរួសរាន់ទៅជួបគ្រូពេទ្យ ប្រសិនបើមានអាការៈពិបាកដក​ដង្ហើម និងខ្សោយ​កំលាំងខ្លាំង។

បើតាមសេចក្តីណែនាំរបស់ក្រសួងសុខាភិបាល ចេញផ្សាយនៅពេលថ្មីៗនេះ បានបញ្ជាក់ថា រោគសញ្ញាដំបូង នៃជំងឺពងបែកដៃជើង និងក្នុងមាត់ ជាទូទៅចាប់ផ្ដើមឡើងដោយមាន ក្តៅខ្លួន ការហូបចុកថយចុះ អស់កំលាំង និងឈឺបំពង់ក។ ស្បែកមានរមាស់ចាប់ផ្តើមចេញក្នុងកំឡុងពេល ១ ទៅ ២ថ្ងៃ ដោយមានស្នាមចំណុចក្រហមអុចៗ និងខ្លះមាន ពងបែកនៅលើបាតដៃ បាតជើង ក្នុងមាត់ និងពេលខ្លះលើកំប៉ះគូទ ឬ អវៈយវៈភេទ។

ដោយឡែកការព្យាបាលវិញ គឺអ្នកវិទ្យាសាស្រ្តមិនទាន់បានរកឃើញជាក់លាក់នោះទេ ប៉ុន្តែ​ជា​ការណែនាំរបស់ក្រសួងសុខាភិបាល​ អ្នកជំងឺគួរពិសាទឹកឲ្យបានច្រើន និងពេលខ្លះអាចត្រូវការ​ព្យាបាល​ទៅតាមរោគសញ្ញា ​ដើម្បីបន្ថយគ្រុនក្តៅ​ដោយថ្នាំ​បញ្ចុះកំដៅ​ និង​ថ្នាំបំបាត់​ការឈឺចាប់ ដែលបណ្តាលមកពីដំបៅក្នុងមាត់។ ទោះជាមិនបានទទួលការព្យាបាល អ្នកជំងឺភាគច្រើន​អាចជាសះស្បើយ​ទៅវិញក្នុងកំឡុងពេលពី ៧ ទៅ ១០ថ្ងៃ ​និងកម្រមានផលវិបាកណាស់។ លើកលែងតែករណីជំងឺមួយចំនួនតូចដែលធ្ងន់ធ្ងរត្រូវទាមទារការព្យាបាលជាបន្ទាន់នៅមន្ទីរពេទ្យ៕ អត្ថបទ៖ទូច សោភ័ណ