ភ្នំពេញ៖ បន្ទាប់ពីមានការឯកភាពរវាងប្រមុខថ្នាក់ដឹកនាំរាជរដ្ឋាភិបាលកម្ពុជា និងរដ្ឋាភិបាលវៀតណាម នៅពេលនេះ រាជរដ្ឋាភិបាលកម្ពុជា បានសម្រេចបង្កើតក្រុមការងារអន្តរក្រសួងដើម្បីសិក្សា រៀបចំ បង្កើត និងដំឡើងកម្រិតច្រកទ្វារព្រំដែនគោកកម្ពុជា-វៀតណាម ខណៈនៅក្នុងកិច្ចប្រជុំលើកដំបូងនៃក្រុមកាងារនេះ គឺមានថ្នាក់ដឹកនាំបណ្តាខេត្តជាប់ព្រំដែនវៀតណាម បានលើកសំណើរបង្កើតច្រកទ្វារព្រំដែនទ្វេភាគី និងច្រកទ្វារតំបន់ថ្មីៗមួយចំនួនទៀតរវាងកម្ពុជា-វៀតណាម។

បើតាមឯកឧត្តមសន្តិបណ្ឌិត សុខ ផល រដ្ឋលេខាធិការ ក្រសួងមហាផ្ទៃ និងជាប្រធានក្រុមការងារ​អន្តរក្រសួង​ដើម្បីសិក្សា រៀបចំ បង្កើត និងដំឡើងកម្រិតច្រកទ្វារព្រំដែនគោកកម្ពុជា-វៀតណាម បានថ្លែងប្រាប់BTV នៅថ្ងៃទី១០ ខែមិថុនានេះថា នៅក្នុងដំណើរការកិច្ចប្រជុំក្រុមការងារ​អន្តរក្រសួងថា​លើកដំបូងនៅថ្ងៃទី៨ ខែមិថុនានេះ ក្រុមការងារបានសម្រេចរៀបចំផែនការ លើកទិសដៅ ​ដើម្បីសិក្សា រៀបចំ បង្កើត ​និងដំឡើងកម្រិតច្រកទ្វារព្រំដែនគោកកម្ពុជា-វៀតណាម និង​ពិនិត្យសំណើរ ពីថ្នាក់ដឹកនាំ បណ្តាខេត្តជាប់ព្រំដែនវៀតណាម​លើការបង្កើតច្រកព្រំដែនថ្មីៗ និង​ដំឡើង​កម្រិតច្រកទ្វារព្រំដែនគោកកម្ពុជា-វៀតណាម ដើម្បីដាក់សំណើរទៅរដ្ឋមន្ត្រី​ក្រសួង​មហា​ផ្ទៃពិនិត្យ។

ឯកឧត្តម សុខ ផល ថ្លែងថា កន្លងមកមកនេះ កម្ពុជាមានច្រកទ្វារសំខាន់ៗចំនួនបីប្រភេទដែលបើក​អោយ​ពលរដ្ឋប្រទេស​ទាំងពីរ​ធ្វើដំណើរឆ្លង​ដែន​ចេញចូលស្របច្បាប់ រួមមាន៖ ទី១.ច្រកទា្វរព្រំដែន​អន្តរជាតិ ទី២. ច្រកទ្វារព្រំដែនទ្វេភាគីដែល​អនុញ្ញាត​អោយ​តែប្រជាពលរដ្ឋ​ តែប្រទេស​ពីរ​កម្ពុជា​វៀតណាម​ប្រើតែលិខិតឆ្លងដែនសម្រាប់ដែនចេញប្រកបរបរអាជីវកម្ម និងទី៣ ច្រកទ្វាតំបន់។

ឯកឧត្តមសន្តិបណ្ឌិត សុខ ផល បន្តថា ​បច្ចុប្បន្ន កម្ពុជា ​មាន​ខេត្តព្រំដែន​វៀតណាម​ប្រមាណ១០ រួមមាន៖ ខេត្តរតនគិរី ខេត្តមណ្ឌលគិរី ក្រចេះ ត្បូងឃ្មុំ ស្វាយរៀង ព្រៃវែង កណ្តាល តាកែវ កំពត និងខេត្តកែប ខណៈនៅ​ពេលថ្មីរាជរដ្ឋាភិបាលកម្ពុជា ​បានចេញសេចក្តីសម្រេចដំឡើង​ច្រកទ្វារ​ព្រំដែន​ទ្វេភាគីកោះថ្ម ទៅជាច្រកទ្វារព្រំដែនអន្តរជាតិតេជោកោះថ្ម នៅខេត្តត្បូងឃុំ ហើយនៅ​ពេលឆាប់ៗនេះ ​ប្រមុខថ្នាក់ដឹកនាំរាជរដ្ឋាភិបាលកម្ពុជា ​និងប្រមុខថ្នាកដឹកនាំរដ្ឋាភិបាល​វៀតណាម នឹងប្រកាសបើកផ្លូវការ៕ អត្ថបទ ស៊ុម សុខជា