ភ្នំពេញ ៖ នៅថ្ងៃទី១០ ខែមិថុនា ឆ្នាំ២០២២ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានឧបត្ថម្ភរថយន្តសង្គ្រោះបន្ទាន់ និងសម្ភារៈប្រើប្រាស់ជាច្រើនជូនដល់កងយោធពលខេមរភូមិន្ទ។

រថយន្តគិលានសង្គ្រោះបន្ទាន់ ១គ្រឿង ដែលបំពាក់ដោយសម្ភារៈបរិក្ខារពេទ្យកំប្លេ សម្រាប់ចល័តសង្គ្រោះបន្ទាន់ ជាអំណោយរបស់សម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ដល់តាមរយៈអ្នកឧកញ៉ាបណ្ឌិត ជា រតនា ទីប្រឹក្សាសម្ដេចតេជោ ហ៊ុន សែន និងលោកជំទាវ លីហៀក ដែលជារថយន្តពេទ្យអំណោយទី ៥០ របស់សម្តេច ត្រូវបានឯកឧត្តមនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានប្រតិបត្តិចាក់វ៉ាក់សាំងការពារជំងឺកូវីដ១៩ ក្រសួងការពារជាតិ នាំយកទៅប្រគល់ជូនដល់ក្រុមគ្រូពេទ្យ ទីចាត់ការសុខាភិបាល អគ្គបញ្ជាការ ដើម្បីជួយសង្គ្រោះ និងព្យាបាលដល់អ្នកជំងឺរបួស និងប្រជាពលរដ្ឋ ដែលរងគ្រោះដោយឧបទេវហេតុផ្សេងៗ ដែលនៅជិតមូលដ្ឋានកងទ័ព។

ឯកឧត្តមនាយឧត្តមសេនីយ៍ ឥត សារ៉ាត់ ជំនួសមុខឱ្យថ្នាក់ដឹកនាំ និងនាយ ពលទាហាន ក្រុមគ្រូពេទ្យ ក្នុងទីចាត់ការសុខាភិបាល អគ្គបញ្ជាការ បានសំដែងនូវអំណរគុណយ៉ាងជ្រាលជ្រៅបំផុតចំពោះកាយវិការមនុស្សធម៌ របស់សម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចជាកាលតែងតែបានយកចិត្តទុកដាក់គិតគូរ ពីសុខទុក្ខ នឹងការខ្វះខាតរបស់កងយោធពលខេមរភូមិន្ទ គ្រប់ទីកន្លែង ។ 

នាយឧត្តមសេនីយ៍ ឥត សារ៉ាត់ បញ្ជាក់ទៀតថា នេះជារថយន្តគិលានសង្គ្រោះបន្ទាន់លើកទី៥០ ហើយ ដែលសម្ដេចតេជោ និងសម្ដេចកិត្តិព្រឹទ្ធបណ្ឌិត បានផ្ដល់តាមរយៈអ្នកឧកញ៉ាបណ្ឌិត ជា រតនា ដែលជាទីប្រឹក្សាផ្ទាល់របស់សម្ដេច ដើម្បីជួយទ្រទ្រង់ និងផ្ដល់គ្រប់លទ្ធភាពដល់គិលានដ្ឋានគ្រប់អង្គភាពរបស់កងយោធពលខេមរៈភូមិន្ទ ក្នុងការរួមចំណែកដើម្បីគាំពារសុខមាលភាពជូនកងទ័ព និងប្រជាជន ។ 

នាយឧត្តមសេនីយ៍ ឥត សារ៉ាត់ បានរំលឹកថា រថយន្តគិលានសង្គ្រោះបន្ទាន់ដែលបានផ្ដល់ជូនដល់ទីចាត់ការសុខាភិបាល អគ្គបញ្ជាការ នាពេលនេះមិនមែនសម្រាប់តែកងទ័ពប៉ុណ្ណោះទេ ប៉ុន្តែក៏នឹងត្រូវជួយដល់ការដឹកជញ្ជូនសង្គ្រោះបន្ទាន់ ដល់ជនរងគ្រោះជាប្រជាពលរដ្ឋ ដែលនៅជិតមូលដ្ឋានកងទ័ពផងដែរ ទៅកាន់មន្ទីរពេទ្យ ពិសេសការចល័តជួយគាំពារ ផ្ដល់ការចាក់វ៉ាក់សាំងការពារជំងឺកូវីដ១៩ ដល់កងទ័ព គ្រួសារកងទ័ព បងប្អូនអតីតយុទ្ធជន និងគ្រួសារ រួមនិងប្រជាពលរដ្ឋផងដែរ ។ 

នាយឧត្តមសេនីយ៍ ឥត សារ៉ាត់ បានរំលឹកដល់ក្រុមគ្រូពេទ្យយោធា ក្នុងទីចាត់ការសុខាភិបាល អគ្គបញ្ជាការ សូមប្រើប្រាស់រថយន្តគិលានសង្គ្រោះនេះ ជាប្រយោជន៍លក្ខណ:មនុស្សធម៌ ដោយមិនមានគិតពីកម្រៃ ៕ អត្ថបទ ៖ ឧត្ដម