ភ្នំពេញ៖ ដូចការគ្រោងទុក សិក្ខាកាមប្រទេសកូឡុំប៊ី បញ្ចប់ការសិក្សាជំនាញមីនពីកម្ពុជា ដោយជោគជ័យ ដែលចាប់ផ្តើមពីថ្ងៃទី ៣០ខែឧសភា ដល់ថ្ងៃទី៩ខែមិថុនា ឆ្នាំ២០២២។

ឯកឧត្តមនាយឧត្តមសេនីយ៍ មាស សុភា ទេសរដ្ឋមន្រ្តីទទួលបន្ទុកកិច្ចការមីន គ្រាប់មិនទាន់ផ្ទុះ និងការងារវិស្វកម្ម កងយោធពលខេមរភូមិន្ទ នៅថ្ងៃថ្ងៃទី១០ខែមិថុនានេះ បានអញ្ចើញជួប​សំណេះសំណាល​ជាមួយសិក្ខាកាមជំនាញសកម្មភាពមីន ​នៃសាធាររដ្ឋកូឡុំប៊ី បញ្ចប់ការសិក្សាជំនាញមីន ពីកម្ពុជាដោយជ័យ ដែលចាប់សិក្សាពីថ្ងៃទី៣០ខែឧសភា ដល់ថ្ងៃទី៩ខែមិថុនា ឆ្នាំ២០២២។ ពិធីសំណេះសំណាលនេះ ធ្វើឡើងនៅមជ្ឈមណ្ឌលសកម្មភាពកំចាត់មីនកម្ពុជា ដែលហៅកាត់ថាCMAC។

នៅឱកាសខាងលើនោះ នាយឧត្តមសេនីយ៍ មាស សុភា បាន​លើកឡើងពី ទំនាក់ទំនងល្អ​នៃ​ប្រទេស​ទាំងពីរ ​ដែលមានកិច្ចសហការគ្នាទៅវិញទៅមក ហើយកម្ពុជាពេញចិត្តផ្ទេរចំណេះជំនាញ​វិស័យមីន ​ដើម្បីចូលរួមចំណែកពន្លឿនផែនការដោះមីននៅប្រទេសកូឡុំប៊ី។

រដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន ​ហៅកាត់ថា JICA បានគាំទ្រ​មជ្ឈមណ្ឌល​សកម្មភាពកំចាត់មីនកម្ពុជា​ ផ្តល់លើការ​ហ្វឹកហ្វឺន​ជំនាញ​បច្ចកទេស​បោសសម្អាតមីន និង​សំណល់ជាតិផ្ទុះពីសង្រ្គាម​ ដល់មន្រ្តីជំនាញប្រទេសកូឡុំប៊ី​ ក្នុងពីរដំណាក់កាល​ មានចំនួន១០វគ្គ ចាប់ពីឆ្នាំ២០១០ ដល់ឆ្នាំ២០២២ ក្រោមគម្រោងកិច្ចសហប្រតិបត្តិការត្បូង-ត្បូង។

តាមផែនការដ្ឋាភិបាលប្រទេសកូឡុំប៊ី ​បានដាក់សំណើសុំជាថ្មី ដល់រដ្ឋាភិបាលជប៉ុន ឲ្យបន្តជួយ​គាំទ្រ​ដល់ការហ្វឹកហ្វឺនដល់នាយទាហានកូឡុំប៊ី ​សម្រាប់រយៈពេល៣ឆ្នាំទៀត ពោលចាប់ពីឆ្នាំ២០២៣ ដល់ឆ្នាំ២០២៥។

ជាការឆ្លើយតប រដ្ឋាភិបាលជប៉ុនយល់ព្រមតាមសំណើររបស់កូឡុំប៊ី និងស្នើរដល់រដ្ឋាភិបាលកម្ពុជា តាមរយៈស៊ីម៉ាក់បន្តការហ្វឹកហ្វឺនជូនតាមសំណើររបស់ប្រទេសកូឡុំប៊ី៕ អត្ថបទ៖ទូច សោភ័ណ