​អ៊ុយក្រែន៖ មនុស្ស​រាប់រយ​នាក់​បាន​បន្ត​ភៀសខ្លួន​ចេញពី​ការប្រយុទ្ធ​គ្នា​ខ្លាំង ​នៅ​អ៊ុយ​ក្រែ​នភា​គ​ខាងកើតកាលពី​ថ្ងៃសុក្រ ខណៈ​កងកម្លាំង​រុស្ស៊ី និង​អ៊ុយ​ក្រែ​ន​ប្រយុទ្ធ​គ្នា​ដើម្បី​គ្រប់គ្រង​ទីក្រុង ​និង​ភូមិ​សំខាន់ៗ​មួយចំនួន​នៅក្នុង​តំបន់ Luhansk និង Donetsk។

​ប្រជាជន​អ៊ុយ​ក្រែ​ន​រាប់រយ​នាក់​បាន​ចាកចេញ​តាម​រថភ្លើង​ជម្លៀស​ពិសេស​ដោយ​ចេញពី​ទីក្រុង Pokrovsk ឆ្ពោះទៅកាន់​ទីក្រុង Dnipro និង​ទីក្រុង​ផ្សេងទៀត​នៅ​ភាគ​ខាងលិច​។ ភាគច្រើន​ជា​ស្ត្រី កុមារ និង​មនុស្ស​ចាស់​បាន​ឡើងលើ​រថភ្លើង​ដែល​ដឹក​មនុស្ស​ប្រមាណ ៣០០​នាក់​ត្រូវ​បាន​បង្ខំ​ឱ្យ​ចាកចេញ ខណៈ​ការប្រយុទ្ធ​គ្នា​បាន​ហ៊ុមព័ទ្ធ​លំនៅឋាន​របស់​ពួកគេ​។​ ស្ត្រី​ម្នាក់​បានសម្រេច​ចិត្ត​ចាកចេញ​ជាមួយ​ក្រុម​គ្រួសារ ដែល​ការបាញ់​ផ្លោង​បាន​ឈាន​ចូលដល់​សង្កា​ត់របស់​ពួកគេ​ក្នុង​ទីក្រុង Krasnohorivka ចម្ងាយ​ប្រហែល ​20គីឡូម៉ែត្រ​ពី​តំបន់ Donetsk ក្នុងការ​គ្រប់គ្រង​រប​ស់​កងកម្លាំង​ផ្តាច់ខ្លួន​គាំទ្រ​រុស្ស៊ី​។

ប្រជាជន​ភៀសខ្លួន​និយាយថា ​យើង​បានរស់នៅ​ជាមួយសង្គ្រាម​អស់​រយៈពេល​ ៨​ឆ្នាំ​មកហើយ​។ កូនៗ​របស់​យើង​មានការ​ព្រួយបារម្ភ​គ្រប់ពេល ពួកគេ​ខ្លាចនៅពេល​យប់ ដូច្នេះ​យើង​បានសម្រេច​ចិត្ត​នាំយក​ពួកគេ​ចេញពី​ទីក្រុង Krasnohorivka ឆ្ងាយ​ពី​ការបាញ់​ផ្លោង​។ ​អ្នក​ជម្លៀស​ខ្លួន​ភាគច្រើន​ដែល​ឡើងលើ​រថភ្លើង​ក្នុង​ទីក្រុង Prokovsk គឺ​មកពី​តំបន់​ដែល​កងកម្លាំងរុស្ស៊ី​កំពុង​ផ្តោត​ការវាយលុក​របស់​ពួកគេ ​ដើម្បី​ដណ្តើមយក​តំបន់ Donbas រួមទាំង​ទីក្រុង Sievierodonetsk, Sloviansk, Bakhmut និង Popasna៕

អត្ថបទ៖ ប៊ុនថន