បាល់ទាត់៖ នៅសល់ ២ថ្ងៃទៀតប៉ុណ្ណោះពានរង្វាន់បាល់ទាត់ពិភពលោក FIFA World Cup Trophy Tour នឹងត្រូវដង្ហែមកដល់ប្រទេសកម្ពុជា ពោលគឺនៅព្រឹកថ្ងៃទី១៥ ខែមិថុនាខាងមុខដែលនឹងមានការអញ្ជើញទទួលស្វាគមន៍ផ្ទាល់ដោយសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជានៅវិមានសន្ដិភាព។
ទន្ទឹមជាមួយគ្នា គេឃើញមានថ្នាក់ដឹកនាំ មន្ដ្រីកីឡា និងអ្នកស្នេហាវិស័យកីឡាជាតិជាច្រើនបានចាប់អារម្មណ៍ និងបង្ហាញនូវការស្វាគមន៍យ៉ាងកក់ក្ដៅចំពោះវត្តមានពានរង្វាន់ដ៏មានតម្លៃ ដែលនឹងធ្វើដំណើរមកដល់កម្ពុជានាថ្ងៃពុធសប្ដាហ៍នេះ។ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានចាត់ទុកនេះគឺជាព្រឹត្តិការណ៍ប្រវត្តិសាស្ដ្រមួយ ហើយការដង្ហែពាន FIFA World Cup នេះនឹងរួមចំណែកលើកទឹកចិត្ត និងផ្ដល់កម្លាំងចិត្តដល់កម្ពុជា ដើម្បីជំរុញការផ្សព្វផ្សាយពីព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ឲ្យមានការគាំទ្រជាសកលថែមទៀត។ រដ្ឋលេខាធិការក្រសួងទេសចរណ៍ និងជាអគ្គលេខាធិការ CAMSOC ដដែលបានបង្ហាញនូវអត្ថប្រយោជន៍សំខាន់ៗ ៣ សម្រាប់វិស័យកីឡាជាតិ ចំពោះដំណើរគោលចររបស់ពានរង្វាន់បាល់ទាត់ពិភពលោកនេះរួមមាន៖ ទី១-ព្រឹត្តិការណ៍នេះនឹងធ្វើឲ្យកីឡាបាល់ទាត់នៅកម្ពុជា មានប្រជាប្រិយភាពពេញនិយមក្នុងស្រទាប់យុវជន យុវវ័យ និងប្រជាពលរដ្ឋរាប់ម៉ឺន រាប់សែននាក់ដែលអាចជំរុញទឹកចិត្តឲ្យរំភើប និងមានមោទនភាពជាតិដែលបានទទួលពានរង្វាន់បាល់ទាត់ពិភពលោកលើកដំបូងបង្អស់នៅព្រះរាជាណាចក្រកម្ពុជា។ ទី២-អាចជួយជំរុញការផ្សព្វផ្សាយបន្ថែមពីដំណើរឆ្ពោះទៅធ្វើម្ចាស់ផ្ទះរបស់កម្ពុជា ក្នុងព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣។ ទី៣- ជាឱកាសដ៏កម្រសម្រាប់កម្ពុជា ដែលបានទទួលព្រឹត្តិការណ៍ជាប្រវត្តិសាស្ដ្រនេះ ពីព្រោះ FIFA នឹងបញ្ចូលក្នុងកំណត់ត្រាប្រវត្តិសាស្ដ្ររបស់ខ្លួន នូវដំណើរឆ្លងកាត់នៃពានរង្វាន់បាល់ទាត់ពិភពលោកមកដល់កម្ពុជា។
ដោយឡែកលោកព្រឹទ្ធាចារ្យបាល់ទាត់ ប៉ែន ផាត បានលើកឡើងថា ដោយសារវិស័យបាល់ទាត់កម្ពុជាកំពុងមានការអភិវឌ្ឍ និងរីកចម្រើន ពិសេសដោយសារកត្ដាសន្ដិភាព ទើប FIFA អាចនាំយកពានរង្វាន់មាសសុទ្ធនេះមកតាំងបង្ហាញនៅកម្ពុជា មុនដាក់ឲ្យក្រុមខ្លាំងៗជុំវិញពិភពលោកធ្វើការប្រកួតប្រជែងក្នុងព្រឹត្តិការណ៍ FIFA World Cup នៅប្រទេសកាតានាចុងឆ្នាំ២០២២ ខាងមុខ។ គួរដឹងថា ពានរង្វាន់បាល់ទាត់ពិភពលោកនឹងដង្ហែមកដល់កម្ពុជានាវេលាម៉ោង ១០ព្រឹកថ្ងៃទី១៥ ខែមិថុនាសប្ដាហ៍ក្រោយ។ បន្ទាប់មកនឹងមានក្បួនដង្ហែពាននេះ ពីព្រលានយន្ដហោះអន្ដរជាតិភ្នំពេញមកកាន់វិមានសន្ដិភាព ដោយពិធីទទួលស្វាគមន៍ពានរង្វាន់បាល់ទាត់ពិភពលោកនេះ នឹងធ្វើឡើងក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋមន្ដ្រី។ បន្ទាប់មកទៀតនឹងមានការនាំយកពានរង្វាន់បាល់ទាត់ពិភពលោកនេះ ទៅដាក់តាំងនៅពហុកីឡដ្ឋានជាតិមរតកតេជោ កន្លែងដែលកម្ពុជាត្រៀមរៀបចំព្រឹត្តិការណ៍ស៊ីហ្គេម ឆ្នាំ២០២៣ ដើម្បីស្វាគមន៍ភ្ញៀវចូលទស្សនា និងថតរូបផ្ទាល់ជាមួយពានរង្វាន់បាល់ទាត់ពិភពលោកនេះ ចាប់ពីម៉ោង ១រសៀលរហូតដល់ម៉ោង ១០យប់អមជាមួយតន្ដ្រីសម័យកំដរទៀតផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
