សៀមរាប៖ ដើម្បីលើកតម្លៃប្រាង្គប្រាសាទបុរាណ ដែលភ្ញៀវទេសចរអាចដើរទស្សនាបានគ្រប់ជ្រុងជ្រោយ នៃចំណុចសំខាន់ៗ របស់ប្រាសាទ អាជ្ញាធរជាតិអប្សរា គ្រោងដាក់ឱ្យដំណើរការវង់ទស្សនាថ្មី ចំនួន២ខ្សែ៖ គឺខ្សែទី១ នៅប្រាសាទចៅសាយទេវតា និងទី២ នៅប្រាសាទធម្មនន្ទ។

លោក យូ ចន្ថា មន្ត្រីនាយកដ្ឋានអភិវឌ្ឍន៍វប្បធម៌សារមន្ទីរ បទដ្ឋានបេតិកភណ្ឌ និងជាអ្នកទទួល​ខុសត្រូវ​ក្រុមការងាររៀបចំខ្សែទស្សនា​ នៅក្នុងរមណីយដ្ឋានអង្គរ​ បានឱ្យដឹងនៅថ្ងៃទី១៣ខែមិថុនា​ឆ្នាំ២០២២នេះថា ខ្សែទស្សនានៅប្រាសាទចៅសាយទេវតា ​និងប្រាសាទធម្មនន្ទ ​នឹងត្រូវរៀបចំ ចំនួន ២ដំណាក់កាល រួមមានទី១៖ គឺរៀបចំ នៅប្រាសាទចៅសាយទេវតា ដើម្បី​បង្ហាញ​ទិស​ដល់​ភ្ញៀវ​ឱ្យចូលទស្សនាតាមផ្លូវចូលច្រកខាងកើត​ ព្រោះកន្លងមក ភ្ញៀវទេសចរ​ដែលមកទស្សនា​ប្រាសាទនេះ​ និយមដើរចូលតាមច្រកខាងជើង​ ដែលធ្វើឱ្យភ្ញៀវមិនបានទស្សនាគ្រប់ជ្រុងជ្រោយ នៃចំណុចសំខាន់ៗ​ក្នុងប្រាសាទមួយនេះ។

លោកបន្ថែមថា ចំណែកដំណាក់កាលទី២ ក្នុងរយៈពេលវែង គឺនៅពេលដែលគម្រោងរៀបចំតំបន់​ទ្វារជ័យ ​រហូតដល់ទំនប់បារាយណ៍ខាងកើតរួចរាល់​ វង់ទស្សនាដែល​នឹងដាក់ឱ្យដំណើរការនេះ ភ្ញៀវទេសចរ​ត្រូវរក្សាទុកមធ្យោបាយធ្វើដំណើរនូវចំណត​ខ្លោងទ្វារជ័យ ដោយចាប់ផ្តើម​ទស្សនា​ចំណុចសំខាន់ៗ នៅក្នុងប្រាសាទធម្មនន្ទ​ រួចបន្តដំណើរទស្សនាទៅកាន់សួនបណ្តុះកូនឈើ របស់​អាជ្ញាធរជាតិអប្សរា ទស្សនារហាត់ទឹក ដោយភ្ជាប់ជាមួយស្ទឹងសៀមរាប ស្ពានបុរាណ និងបន្ទាប់មក ត្រូវបន្ត​ទស្សនាប្រាសាទចៅសាយទេវតា​តាមច្រកខាងកើត។

លោក បន្ដថា ខ្សែទស្សនាទាំងពីរខាងលើ គ្រោងដាក់ឱ្យដំណើរការ ក្នុងពេលឆាប់ៗនេះ ខណៈដែល​បច្ចុប្បន្នក្រុមការងារកំពុងគិតគូរ​រៀបចំ ជាផ្ទាំងព័ត៌មាន​ បរិយាយអំពីចំណុចសំខាន់ៗ​ នៃរូបចម្លាក់ និងប្រាសាទ ​ស្លាកសញ្ញាបង្ហាញទិស​ និងភ្នាក់ងារសម្រាប់ជួយសម្រួលដល់ភ្ញៀវជាដើម។

លោក បញ្ជាក់ថា ការរៀបចំខ្សែទស្សនា បាននាំមកនូវសុវត្ថិភាពដល់ប្រាសាទ ហើយលើសពីនេះ​នឹងនាំឱ្យភ្ញៀវទេសចរបានស្គាល់ច្បាស់ ​និងទទួលបានបទពិសោធន៍ល្អៗ ពីការទស្សនាប្រាសាទ​បុរាណ។ អាជ្ញាធរជាតិអប្សរា ​សូមលើកទឹកចិត្ត និងអំពាវនាវដល់ភ្ញៀវទេសចរជាតិ និងអន្តរជាតិ គោរពតាមការណែនាំនៃវង់ទស្សនា ដែលបានរៀបចំឡើង។

សូមជម្រាបថា ប្រាសាទធម្មនន្ទ ​មានទីតាំងស្ថិតនៅតាមបណ្ដោយផ្លូវវង់តូច ទល់មុខនឹងប្រាសាទ​ចៅសាយទេវតា ខាងកើតក្លោងទ្វារជ័យក្រុងអង្គរធំ ​ក្នុងសង្កាត់នគរធំ ក្រុងសៀមរាប៕