​វាយកូនបាល់៖ ​ក្តីសង្ឃឹម​ឈ្នះ​ពាន​ដំបូង​របស់ Andy Murray ក្នុង​រយៈពេល ៦ឆ្នាំ​ត្រូវ​បានបញ្ចប់​ក្រោយ​ចាញ់​កីឡាករ​អ៊ីតាលី Matteo Berrettini នៅ​វគ្គ​ផ្តាច់ព្រ័ត្រ Stuttgart Open​។ ​​កីឡាករ​ស្កុ​ត​ឡេ​ន​វ័យ ៣៥ឆ្នាំ​រូបនេះ​ត្រូវបាន Berrettini នាំមុខ​មួយ​សិត​មុន ៦-៤ មុនពេល​យកឈ្នះ​វិញ​នៅ​សិត​ទី​ពីរ ៧-៥ តែ​បញ្ហា​របួស​ធ្វើឱ្យ​អតីត​កីឡាករ​លំដាប់​លេខ ១ ពិភពលោក​រូបនេះ​បរាជ័យ​នៅ​សិត​ចុងក្រោយ ៦-៣​។

​​យ៉ាងណាក្តី ថ្វីបើ​ចាញ់​នៅ​វគ្គ​ផ្តាច់ព្រ័ត្រ Andy Murray នឹង​ឡើងមក​កាន់​លំដាប់ថ្នាក់ Top50 លើកដំបូង​តាំងពី​ឆ្នាំ២០១៨ នៅ​ថ្ងៃ​ចន្ទ​នេះ​។ ​​ចំណែកឯ Matteo Berrettini ក៏​ជា​ជ័យជំនះ​ដ៏​អស្ចារ្យ​មួយ​សំរាប់​គេ​ផងដែរ​ ក្រោយ​អវត្តមាន​ពី​ទីលាន​ប្រកួត​រយៈពេល ៣ខែ​កន្លងមក​។ ​​ងាក​មក​ការប្រកួត​មួយ​កម្មវិធី​ទៀត កីឡាករ​ហូ​ឡង់ Tim van Rijthovan បាន​គ្រង​ជើងឯក​កម្មវិធី Libema Open មិនគួរ​ឱ្យ​ជឿ​ក្រោយ​យកឈ្នះ​កីឡា​ករលេខ ២ ពិភពលោក​រុស្ស៊ី Daniil Medvedev ៦-៤ និង ៦-១​។

​​កីឡាករ​ហូ​ឡង់ Tim van Rijthova ដែលមាន​ចំណាត់ថ្នាក់​ពិភពលោក​លេខ ២០៥ មិនដែល​ឈ្នះ​ពាន​ណាមួយ​ឡើយ​នៅក្នុង​ក្របខណ្ឌ ATP តែ​លើក​នេះ​បាន​យកឈ្នះ​កីឡាករ​ខ្លាំងៗ​មួយចំនួន​ដូចជា Taylor Fritz, Felix Auger-Aliassime មុននឹង​យកឈ្នះ Daniil Medvedev ចំណាយពេល​ត្រឹម ៦៥នាទី​។ ​​សំរាប់ Daniil Medvedev ថ្វីបើ​ចាញ់​ការប្រកួត​នេះ តែ​កីឡាករ​រុស្ស៊ី​រូបនេះ​នឹង​ឡើង​មកឈរ​លេខ ១ ពិភពលោក​នៅ​ថ្ងៃ​ចន្ទ​នេះ​ទំលាក់ Novak Djokovic ទៅ​លេខ ២៕

​អត្ថបទ​៖​នាង សុភា​វុ​ធ