ភ្នំពេញ៖ រដ្ឋបាលរាជធានីភ្នំពេញ បានដាក់ឲ្យដំណើរការបង្គោលភ្លើងបំភ្លឺផ្លូវចំនួន ១០០បង្គោល នៅមហាវិថីថ្មីមួយខ្សែ ដែលមានទទឹង ៣០ម៉ែត្រ ដោយចាប់ពីបុរីអង្គរភ្នំពេញ ដល់មុខហ្រ្គេនភ្នំពេញ ដើម្បីអោយ​បងប្អូនប្រជាពលរដ្ឋ ងាយស្រួលធ្វើដំណើរពេលរាត្រីផង លើកសោភណ្ឌភាពទីក្រុងផង និងដើម្បីកាត់បន្ថយបទល្មើសផ្សេងៗ និងគ្រោះថ្នាក់ចរាចរណ៍ផងដែរ។​

ជាក់ស្ដែងមហាវិថីថ្មី មួយខ្សែនេះមានបណ្តោយផ្លូវជិត ៦គីឡូម៉ែត្រ មានសួនច្បារកណ្តាល ចាប់ពីផ្លូវលេខ១០០៣ (ផ្លូវបត់ចូលផ្សារទំនើបអ៊ីអនម៉លសែនសុខ) ស្របប្រឡាយមេខាងជើងរាជធានីភ្នំពេញ រហូតដល់មហាវិថី ឈ្នះ ឈ្នះ ក្នុងភូមិសាស្ត្រខណ្ឌឫស្សីកែវ រាជធានីភ្នំពេញ។​

ការដាក់ឲ្យដំណើរការ​បង្គោលភ្លើងព្រែកជាពីរខាងលើនេះ បានធ្វើឡើង ដោយរដ្ឋបាលរាជធានីភ្នំពេញ កាលពីយប់ថ្ងៃ២៤ ខែមីនា ឆ្នាំ​២០២១ នៅស្របប្រឡាយមេខាងជើងរាជធានីភ្នំពេញ ចំនួន ១០០បង្គោល​ចាប់ពីបុរីអង្គរភ្នំពេញ ដល់មុខហ្រ្គេនភ្នំពេញ​មូលដ្ឋានសង្កាត់ច្រាំងចំរះទី១ និងទី២ ក្នុងខណ្ឌឫស្សីកែវ។​

ឯកឧត្តម ឃួង ស្រេង អភិបាលរាជធានីភ្នំពេញ ខណៈដែលលោកដឹកនាំមន្ត្រីជំនាញ និងអាជ្ញាធរចុះពិនិត្យមើលការដ្ឋានស្ថាបនាផ្លូវនេះ កាលពីរសៀលថ្ងៃទី១៥ ខែកុម្ភៈ ឆ្នាំ២០២១កន្លងមក លោកធ្លាប់បានបញ្ជាក់ឲ្យដឹងហើយថា មហាវិថីថ្មី១ខ្សែនេះ បានមកពីការចូលរួមពីសប្បុរជន ដែលបាននិងកំពុងអភិវឌ្ឍន៍លំនៅដ្ឋាន នៅតាមបណ្ដោយផ្លូវនេះ ដោយសហការជាមួយអាជ្ញាធររាជធានីភ្នំពេញ។​

មហាវិថីនេះ ត្រូវស្ថាបនាឡើងជា២ជំហាន ដោយជំហានទី១ ចាប់ពីផ្លូវលេខ១០០៣ រហូតដល់មុខហ្គ្រេនភ្នំពេញ និងបន្តពីហ្គ្រេនភ្នំពេញ រហូតទៅដល់ផ្លូវមហាវិថីឈ្នះឈ្នះ ដែលមានទទឹង៣០ម៉ែត្រ មានសួនច្បារនៅកណ្ដាល ជាមួយនឹងការដាក់បណ្ដាញលូនៅសងខាងផ្លូវផងដែរ​។

​គួរបញ្ជាក់ថា ការដ្ឋានស្ថាបនាមហាវិថីខាងលើនេះ បានចាប់ផ្តើមកាលពីថ្ងៃទី០៧ ខែកញ្ញា ឆ្នាំ២០២០ ក្រោមវត្តមានឯកឧត្តម ឃួង ស្រេង អភិបាលរាជធានីភ្នំពេញមហាវិថីថ្មីនេះ រត់ត្រង់ជួរ​ភ្ជាប់មកមហាវិថីអង្គរ ឆ្ពោះមករង្វង់មូលកាំកូ​ជាប្រភេទ​ផ្លូវភ្លោះ មានប្រវែង ៥៨៦០ម៉ែត្រ ទទឹង ៣០ម៉ែត្រ ជាផ្លូវបេតុង កម្រាស់ ២០សង់ទីម៉ែត្រ។

ក្នុងនោះ ផ្លូវសងខាង១២ម៉ែត្រសួនកណ្តាល ២ម៉ែត្រ និងចិញ្ចើមផ្លូវសងខាង២ម៉ែត្រ ផ្លូវទ្វេរទិស មាន៣គន្លង សម្រាប់រថយន្តទៅមក និង១គន្លង សម្រាប់ទោចក្រយានយន្តទៅមក ដាក់បណ្តាញលូសងខាងផ្លូវទំហំ ០.៨ម៉ែត្រ ប្រវែង ១១៧២០ម៉ែត្រ និងដាក់លូឆ្លងកាត់ទទឹងផ្លូវ ចំនួន ៨កន្លែង៕ អត្ថបទ៖ កុម្ភៈ