ភ្នំពេញ៖ ខណៈកម្ពុជា ពុំមានករណីឆ្លងថ្មីនៃការឆ្លងរាតត្បាតមេរោគកូវីដ១៩ ក្រោយការបោះឆ្នោតរយៈពេលជាង១សបា្តហ៍កន្លងមកនេះ បណ្តាឱសថស្ថានលក់ថ្នាំពេទ្យមួយចំនួន នៅក្នុងរាជធានីភ្នំពេញ បានអះអាងថា ពុំមានពលរដ្ឋណាមកស្វែងរកទិញឱសថ ពាក់ព័ន្ធនឹងការព្យាបាលជំងឺកូវីដ១៩នោះទេ។

តំណាងឱសថស្ថាន ម៉ូលីដា នៅជិតវត្តមហាមន្ត្រី រាជធានីភ្នំពេញ ថ្លែងប្រាប់BTVនៅថ្ងៃទី១៣ ខែមិថុនានេះថា នៅក្នុងរយៈពេលជាង២សប្តាហ៍កន្លងមក​ សំគាល់ឃើញថា នៅក្នុងឱសថស្ថាន​ម្តុំវត្តមហាមន្ត្រីនេះ ពុំសូវមានពលរដ្ឋឬបណ្តាឱសថស្ថាននៅតាមបណ្តាខេត្តឆ្ងាយៗ មកស្វែងការ​ទិញ​ឱសថបំរើអោយការព្យាបាលជំងឺកូវីដ១៩នោះទេ ជាពិសេសការទិញឱសថMolnupiravir សម្រាប់​មនុស្សចាស់​ និងមនុស្សក្មេង ​និងទិញឧបរករណ៍​តេស្តរហ័ស​ជាដើម ដើម្បីយកទៅ​ចែកចាយ​លក់បន្ត ហើយពលរដ្ឋធម្មតាក៏គ្មានមកទិញដែរ។

ដោយឡែកសម្រាប់តំណាងឱសថស្ថានផ្សារតាប៉ាងស្រីមុំ នៅជិតផ្សារធំថ្មីវិញ ក៏បានថ្លែងដែរថា នៅក្រោយថ្ងៃបុណ្យចូលឆ្នាំថ្មីប្រពៃណីចិនវៀតណាម ការលក់ទិញឱសថនានា​ដែលពាក់ព័ន្ធ​នឹង​ព្យាបាលជំងឺកូវីដ១៩ ​ជាពិសេសឱសថMolnupiravir ​និងឧបរករណ៍តេស្តរហ័សជាដើមនោះ លក់ដាច់បានប្រមាណ១០% ប៉ុន្តែរហូតមកដល់អំឡុងពេលមុន​ និងក្រោយពេលបោះឆ្នោតនេះ មិនមានពលរដ្ឋមកទិញឱសថនានាពាក់ព័ន្ធនឹងការព្យាបាលកូវីដ១៩នោះដែរ ។

ឯកឧត្តម ម៉ុក រ៉ាឌី អគ្គនាយករដ្ឋបាលក្រសួងប្រៃសណីយ៍ និងទូរគមនាគមន៍ បានថ្លែងថា បច្ចុប្បន្ន ដើម្បី​បន្តចូលរួម​ទប់ស្កាត់​ការឆ្លងរាលដាលនៃជំងឺកូវីដ-១៩ និង​បង្កើតបាន​ភាពស៊ាំ​សហគមន៍​រឹងមាំ​ទប់ទល់នឹងជំងឺរាតត្បាតសកល កូវីដ-១៩ ក្រុមការងារក្រសួងប្រៃសណីយ៍​ និងទូរគមនាគមន៍ បាននាំចូលបន្ថែមឱសថ ផាកឡូវីដ (PAXL0VID) សម្រាប់ ព្យាបាលជំងឺកូវីដ-១៩ ​ចំពោះមនុស្ស ចាប់ពីអាយុ ១២ឆ្នាំឡើងទៅ ​បន្ថែមលើការចែកចាយលក់ឱសថម៉ូលណាទ្រីស (MOLNATRIS) សម្រាប់​ព្យាបាលជំងឺកូវីដ-១៩ ​ចំពោះមនុស្សចាប់ពីអាយុ ១៨ឆ្នាំឡើងទៅ ហើយ​ការលក់ឱសថ​ទាំង​ពីរប្រភេទនេះ មានកម្រិតទាបជាពិសេសអំឡុងក្រោយការបោះឆ្នោតជ្រើសរើស​ក្រុមប្រឹក្សាឃុំ​សង្កាត់អាណតិ្តទី៥នេះ៕ អត្ថបទ ស៊ុម សុខជា