អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃអាទិត្យថា ចំនួនអ្នកស្លាប់ និងរបួសរបស់រុស្ស៊ីអាចកើនឡើងលើសពី ៤០,០០០នាក់នៅក្នុងខែមិថុនា។

ថ្លែងទៅកាន់ប្រជាជាតិនៅក្នុងសុន្ទរកថាប្រចាំថ្ងៃ លោក Zelenskyy បានរំលឹកឡើងវិញនូវការអំពាវនាវរបស់អ៊ុយក្រែន សម្រាប់ប្រព័ន្ធការពារដែនអាកាសទំនើបពីប្រទេសលោកខាងលិច។ លោក Zelenskyy និយាយថា ការដែលប្រទេសអ៊ុយក្រែនក្លាយជាសមាជិកសហភាពអឺរ៉ុប នឹងពង្រឹងទាំងប្រទេសអ៊ុយក្រែន និងសហភាពអឺរ៉ុប។ លោក Zelenskyy និយាយថា ការប្រយុទ្ធគ្នាតាមដងផ្លូវដ៏ឃោរឃៅកំពុងបន្តនៅទីក្រុង Sievierodonetsk ហើយលោកមានមោទនភាពចំពោះអ្នកការពារអ៊ុយក្រែន ដែលអស់រយៈពេលជាច្រើនសប្តាហ៍បានទប់ស្កាត់ការរុលចូលទៅមុខរបស់រុស្ស៊ី៕

អត្ថបទ៖ ប៊ុនថន