​ប្រណាំង​រថយន្ត៖ ​កីឡាករ​ប្រណាំង F1 ហូ​ឡង់ Max Verstappen បាន​ប្រជែង​ឈ្នះ​ការប្រកួត F1 នៅលើ​ទឹកដី​អា​ស៊ែ​បៃ​ហ្សង់​ដើម្បី​បន្ត​នាំមុខ​ក្នុង​តារាង​ជើងឯក​ពិភពលោក ស្របពេល​គូប្រជែង Charles Leclerc មាន​បញ្ហា​គ្រឿង​ម៉ាស៊ីន​។

​​នេះ​ជា​លើក​ទី​ពីរ​ហើយ​ដែល​កីឡាករ​របស់ Ferrari, Charles Leclerc មាន​បញ្ហា​គ្រឿង​ម៉ាស៊ីន​ក្នុងចំណោម ៣ទីលាន​ដែល​ខ្លួន​នាំមុខ​។ ​​ជាមួយគ្នា​នោះដែរ អ្នកការពារ​តំណែង​ជើងឯក Max Verstappen ដែល​ចេញដំណើរ​នៅ​ចំណាត់ថ្នាក់​ទី៣ បាន​ប្រជែង​ឈ្នះ​ការប្រកួត​នេះ បើទោះជា​ចេញដំណើរ​ដំបូងមិត្ត​រួម​ក្រុម Red Bull របស់ខ្លួន Sergio Perez ជា​អ្នក​នាំមុខ​ក៏ដោយ​។ ​​កីឡាករ​ម៉ិ​ក​ស៊ិ​ក Sergio Perez ដែល​ទើប​ទទួលបាន​កុងត្រា​ថ្មី​ជាមួយ Red Bull នោះ​ទទួលបាន​ចំណាត់ថ្នាក់​លេខ ២ នៅអា​ស៊ែ​បៃ​ហ្សង់​នេះ ខណៈ​លេខ ៣ គឺ​កីឡាករ​អង់គ្លេស​របស់ Mercedes មិនមែន Lewis Hamilton តែ​ជា George Russell ស្រប​ពេលដែល​ជើងឯក​ពិភពលោក ៧ សម័យ Hamilton បាន​ត្រឹម​លេខ ៤​។

ជ័យជំនះ​របស់ Max Verstappen បានធ្វើ​ឱ្យគេ​បន្ត​គ្រប់គ្រង​តារាង​ជើងឯក​ពិភពលោក​ឡើង​ដាច់ Charles Leclerc ដែល​ធ្លាក់​ដល់​លេខ​បី ៣៤ពិន្ទុ ស្រប​ពេលដែល Sergio Perez ឡើងមក​លេខ ២ ដេញ​ពីក្រោយ Verstappen ២១ពិន្ទុ​។ ​​ទីលាន​បន្ទាប់ F1 នឹង​បន្តទៅ​ប្រទេស​កាណាដា​នៅ​ថ្ងៃទី២០ ខែមិថុនា​នេះ​៕

​អត្ថបទ​៖​នាង សុភា​វុ​ធ