ម៉ារ៉ាតុង៖ លោក សែម ផល្លា នាយកបច្ចេកទេសរៀបចំព្រឹត្តិការណ៍ម៉ារ៉ាតុងអន្ដរជាតិរំពឹងថា ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិនឹងមានអ្នកចូលរួមច្រើនឡើងវិញនៅឆ្នាំបន្ទាប់ ហើយអាចប្រើពេល ២ឆ្នាំប៉ុណ្ណោះដើម្បីទាក់ទាញអ្នកចូលរួមច្រើនជាងឆ្នាំ២០១៩ មុនផ្ទះជំងឺរាតត្បាលជាសកលកូវីដ-១៩។
ការបង្ហាញសុទិដ្ឋិនិយមបែបនេះ បន្ទាប់ពីព្រឹត្តិការណ៍កីឡា និងទេសចរណ៍ប្រចាំទីក្រុងភ្នំពេញនេះ ត្រូវបានក្រសួងទេសចរណ៍ និងគណៈកម្មាធិការជាតិអូឡាំពិកកម្ពុជា ប្រកាសរៀបចំឡើងវិញជាលើកទី១០ នាថ្ងៃទី១៩ ខែមិថុនា ឆ្នាំ២០២២ ចុងសប្ដាហ៍នេះ បន្ទាប់ពីទទួលបានការគាំទ្រ និងអនុញ្ញាតពីរាជរដ្ឋាភិបាលកម្ពុជា។ អ្នកជំនាញដដែលបន្ដថា ព្រឹត្តិការណ៍ភ្នំពេញពាក់កណ្ដាលម៉ារ៉ាតុអន្ដរជាតិនាចុងសប្ដាហ៍នេះ មានអ្នកចូលរួមប្រមាណ ៤ពាន់នាក់ដែលភាគជាច្រើនជាប្រជាពលរដ្ឋក្នុងស្រុក។ តែលោកបានចាត់ទុកចំនួនអ្នកត្រៀមចូលរួមនេះគឺជាការស្ដារឡើងវិញដ៏ល្អ បន្ទាប់ពីខកខានរៀបចំ ២ឆ្នាំដោយសារបញ្ហាកូវីដ-១៩។
លោក សែម ផល្លា បន្ថែមថា ឥទ្ធិពលកូវីដ-១៩ បានធ្វើឲ្យពិភពលោក រួមទាំងកម្ពុជារាំងស្ទះគ្រប់វិស័យអស់រយៈពេល ២ឆ្នាំ តែដោយសារការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា បានធ្វើឲ្យគ្រប់វិស័យ ពិសេសវិស័យកីឡាមានសកម្មភាពឡើងវិញ។ តាមរយៈនេះលោករំពឹងថា ឆ្នាំក្រោយព្រឹត្តិការណ៍ភ្នំពេញពាក់កណ្ដាលម៉ារ៉ាតុង អាចមានអ្នកចូលរួមច្រើនស្មើឆ្នាំ២០១៩ ហើយឆ្នាំបន្ទាប់ទៀតនឹងមានអ្នកចូលរួមកាន់តែច្រើនជាងមុន។ សូមបញ្ជាក់ថា ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិបានខកខានរៀបចំ ២ឆ្នាំកាលពីឆ្នាំ២០២០ និងឆ្នាំ២០២១ តែដោយសារស្ថានភាពកូវីដ-១៩ ធូរស្រាល និងមានការអនុញ្ញាតពីរាជរដ្ឋាភិបាល ក្រសួងទេសចរណ៍ និងគណៈកម្មាធិការជាតិអូឡាំពិកកម្ពុជាក៏បានសម្រេចរៀបចំឡើងវិញ ដែលគ្រោងនឹងរៀបចំនាព្រឹកថ្ងៃទី១៩ ខែមិថុនាចុងសប្ដាហ៍នេះ នៅមុខព្រះបរមរាជវាំង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
