បាល់ទាត់៖ កីឡដ្ឋានខេត្តកំពង់ស្ពឺបានបញ្ចប់ការងារបេតុងគ្រឹះ ១០០% ហើយគិតត្រឹមថ្ងៃទី២៥ ខែមីនា ឆ្នាំ២០២១។ នេះបើតាមការជូនដំណឹងលើទំព័រហ្វេសប៊ុកផ្លូវការ របស់កីឡដ្ឋានថ្មីស្រឡាងដែលមានមូលដ្ឋាននៅទីតាំងនៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺនេះ។
ផ្អែកលើការជូនដំណឹងនេះមានន័យថា ការបញ្ចប់ការងារបេតុងគ្រឹះនៃកីឡដ្ឋានខេត្តកំពង់ស្ពឺ គឺមានរយៈពេល ៣២ថ្ងៃគិត បន្ទាប់ពីរៀបចំពិធីក្រុងពាលីបើកការដ្ឋាន សាងសង់ជាផ្លូវការក្រោមវត្តមានឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាអ្នកតំណាងរាស្ដ្រមណ្ឌលកំពង់ស្ពឺកាលពីថ្ងៃទី២១ ខែកុម្ភៈកន្លងទៅ។ គួរបញ្ជាក់ថា កីឡដ្ឋានស្ដង់ដារអន្តរជាតិនេះ សាងសង់ឡើងក្រោមគំនិតផ្ដួចផ្ដើមរបស់ឯកឧត្តម ហ៊ុន ម៉ានី ដោយគ្រោងចំណាយពេលសាងសង់រយៈពេល ១៥ខែ និងចំណាយថវិកាប្រមាណ ៣លានដុល្លារ។ កីឡដ្ឋានដែលត្រៀមប្រើស្មៅសិប្បនិម្មិតនេះ ត្រូវបែងចែកការសាងសង់ជា ២ដំណាក់កាល ដោយដំណាក់កាលទី១ គឺជាការសាងសង់ក្លោងទ្វារធំចំនួន ២ របងជុំវិញ សួនកុមារ និងទីលានរត់ កន្លែងអង្គុយ ៣,០០០កៅអី ទីលានប្រកួតបាល់ទាត់ ដែលបំពាក់ដោយភ្លើងបំភ្លឺប្រកួតពេលយប់ បាន រួមជាមួយការរៀបចំបរិវេណជុំវិញ និងដំណាក់កាលទី២ ជាការសាងសង់កន្លែងអ្នកទស្សនាកើនដល់ ៦,០០០នាក់។
ឯកឧត្តម ហ៊ុន ម៉ានី ធ្លាប់មានប្រសាសន៍ថា គម្រោងសាងសង់កីឡដ្ឋានដ៏ធំនេះ នឹងក្លាយជាផ្នែកមួយដើម្បីរួមចំណែកអភិវឌ្ឍវិស័យ កីឡាបាល់ទាត់កម្ពុជាឲ្យរីកចម្រើន ក្នុងន័យចូលរួមផែនការអភិវឌ្ឍធនធានមនុស្ស ពិសេសធនធានកីឡាករ ដើម្បីត្រៀមឆ្ពោះទៅរកការប្រកួតកីឡាស៊ីហ្គេមលើកទី៣២ នាឆ្នាំ២០២៣ ដែលជាព្រឹត្តិការណ៍ប្រវត្តិសាស្ដ្រលើកដំបូងនៅកម្ពុជា។ ការសាងសង់នេះផ្ដើមចេញពីស្មារតីរួមគ្នា ដោយមានការគាំទ្រពីដៃគូសហការ ដើម្បីជំរុញការអភិវឌ្ឍ និងលើកមុខមាត់ខេត្តតាមរយៈវិស័យកីឡា ពិសេសកីឡដ្ឋាននេះមិនមែនជារបស់បុគ្គលិក ឬក្រុមហ៊ុនណាឡើយ គឺជារបស់ប្រជាពលរដ្ឋខេត្តកំពង់ស្ពឺងទាំងមូលតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
