​អ៊ុយក្រែន៖ អភិបាល​តំបន់ ​Luhansk បាន​ប្រាប់​សារព័ត៌មាន RFE/RL ថា ស្ពាន​ទាំងអស់​នៅ​ខាងក្រៅ​ទីក្រុង Severodonetsk ភាគ​ខាងកើត​របស់​ប្រទេស​អ៊ុយ​ក្រែ​ន​ត្រូវបាន​បំផ្លាញ ​ហើយ​ស្ថានភាព​សម្រាប់​ប្រជាពលរដ្ឋ​ដែល​រស់​នៅ​ក្នុង​ទីក្រុង​នេះ​កំពុង​ជួបប្រទះ​ស្ថានភាព​លំបាក​ខ្លាំង។​

​លោក Serhiy Hayday ​បាន​និយាយ​ថា ​ស្ពាន​ទាំងអស់​ត្រូវ​បាន​កម្ទេច​ចោល ដូច្នេះ​មិន​អាច​ដឹកជញ្ជូន​អ្វី​ទៅកាន់​ទីក្រុង​នេះ​បានទេ​នៅ​ពេល​បច្ចុប្បន្ន​នេះ ដោយ​បន្ថែម​ថា សូម្បីតែ​ការ​ជម្លៀស​ពលរដ្ឋ​ក៏​មិន​អាច​ធ្វើ​ទៅ​បាន​ដែរ​។ ​លោក​ថា កងកម្លាំង​រុស្ស៊ី​បាន​កម្ទេច​ហេដ្ឋារចនាសម្ព័ន្ធ​ទាំងស្រុង ដូចជា​បណ្ដាញ​ផ្គត់ផ្គង់​ឧស្ម័ន ទឹក និង​អគ្គិសនី ដោយ​គូស​បញ្ជាក់​ផង​ដែរ​ថា បញ្ហា​ចម្បង​នោះ​គឺ​សេវា​ថែទាំ​វេជ្ជសាស្ត្រ​។​ យោង​តាម​លោក Hayday បច្ចុប្បន្ន​នេះ​កងកម្លាំង​រុស្ស៊ី​គ្រប់គ្រង​ទីក្រុង Severodonetsk ៧០ ទៅ ៨០%​។

​លោក​បាន​រៀបរាប់​បន្ថែម​នៅ​លើ​បណ្ដាញ​សង្គម Facebook ថា ទីក្រុង Severodonetsk មិន​ត្រូវ​បាន​បិទ​ទេ ហើយ​នៅ​តែ​មាន​ទំនាក់ទំនង​ជាមួយ​ទីក្រុង​នេះ​។ ​យោធា​អ៊ុយ​ក្រែ​ន​បាន​និយាយ​ថា កងកម្លាំង​របស់​ខ្លួន​ត្រូវ​បាន​កងទ័ព​រុស្ស៊ី​វាយ​រុញ​ដកថយ​ចេញពី​ចំណុចកណ្ដាល​នៃ​ទីក្រុង Severodonetsk ជាទី​ក្រុង​របស់​តំបន់ Donbas ដែល​ត្រូវ​បាន​មើល​ឃើញ​ថាជា​សមរភូមិ​ប្រយុទ្ធ​ដ៏​ក្ដៅ​គគុក ស្រប​ពេល​កង​កម្លាំង​អ៊ុយ​ក្រែ​ន និង​រុស្ស៊ី​កំពុង​វាយ​ដណ្ដើម​គ្រប់គ្រង​៕

អត្ថបទ៖ សុខមាន