ភ្នំពេញ៖ ក្នុងពេលអញ្ជើញទទួលដូសជំរុញ (ដូសទី៥) សម្តេចពញាចក្រី ហេង សំរិន ប្រធានរដ្ឋសភា បានអំពាវនាវដល់ប្រជាពលរដ្ឋទៅទទួលដូសជំរុញ ដើម្បីបង្ការភាពធ្ងន់ធ្ងរដោយសារជំងឺកូវីដ-១៩។

ការអំពាវនាវរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភា ធ្វើឡើងក្នុងពេលអញ្ជើញ​ចាក់វ៉ាក់សាំងដូសជំរុញ ដូសទី៥ បង្ការជំងឺកូវីដ-១៩ នៅវិមានរដ្ឋសភា ដែលរៀបចំដោយក្រសួង​សុខាភិបាល​ និងអគ្គលេខាធិការដ្ឋានរដ្ឋសភា នៅថ្ងៃទី១៤ ខែមិថុនា ឆ្នាំ២០២២នេះ។

សម្តេច ប្រធានរដ្ឋសភា បាន​អំពាវនាវដល់ជនរួមជាតិទាំងអស់ទៅចាក់វ៉ាក់សាំង​ដូសជំរុញ​ឱ្យបាន​គ្រប់គ្នាៗ ដើម្បីការពារជំងឺកូវីដ-១៩ ​ដោយសារជំងឺដ៏សាហាវនេះ នៅតែជាក្តីកង្វល់របស់មនុស្ស​ជាតិ​នៅឡើយ។ សម្តេចប្រធានរដ្ឋសភា ​បានសង្កត់ធ្ងន់ថា ​មានតែវ៉ាក់សាំថទេ ដែលអាចទប់ស្កាត់​មិនឱ្យ​ជំងឺនេះធ្លាក់ក្នុងសភាពធ្ងន់ធ្ងរបាន។

ក្នុងនោះ សម្តេចប្រធានរដ្ឋសភា បានអំពាវនាវដល់ជនរួមជាតិបន្តអនុវត្តវិធានការសុខាភិបាល ដូចជា បីកុំ បីការពារ ឱ្យបានខ្ជាប់ខ្ជួនជាប្រចាំទោះបីគ្រប់ៗគ្នាទោះបានទទួលវ៉ាក់សាំង​ទាំងដូស​មូលដ្ឋាន ​និងជំរុញហើយក្តី។

សម្តេចប្រធានរដ្ឋសភា ​បានសម្តែងការកោតសរសើរចំពោះរាជរដ្ឋាភិបាល ដែលបានខិតខំ​ប្រឹង​ប្រែង​ការពារ​អាយុជីវិត​ប្រជាពលរដ្ឋ ​ជាពិសេសការអនុវត្តគោល​នយោបាយវ៉ាក់សាំង​បានយ៉ាង​ជោគជ័យ នៅក្នុងនោះកម្ពុជាមិនខ្វះវ៉ាក់សំាង​ចាក់ជូនពលរដ្ឋឡើយ ជាមួយផែនការច្បាស់លាស់​វែងឆ្ងាយទៅមុខទៀត ​ដូចជាការបង្កើតរោងចក្រផលិតវ៉ាក់សំាងនៅប្រទេសតែម្តង។

បន្ថែមលើសពីនេះ ​សម្តេចប្រធានរដ្ឋសភា បានថ្លែងអំណរគុណយ៉ាងជ្រាលជ្រៅចំពោះបណ្តា​ប្រទេស​ជាមិត្ត អង្គការដៃគូអភិវឌ្ឍន៍ទាំងឡាយដែលបានផ្តល់ជំនួយជាថវិកា វ៉ាក់សាំង និង​ឧបករណ៍​វិទ្យាសាស្រ្តសុខាភិបាលដល់កម្ពុជា ក្នុងការទប់ស្កាត់ ការពារអាយុជីវិតប្រជាពលរដ្ឋពីជំងឺ​កូវីដ-១៩ ជាបន្តបន្ទាប់រហូតមក៕ អត្ថបទ៖ ឧត្ដម+រិទ្ធ