​បាល់ទាត់៖ ​ខ្សែប្រយុទ្ធ Aston Villa, Ollie Watkins បានបង្ហាញ​ខ្លួន​លើកដំបូងឲ្យ​ក្រុម​ជំរើសជាតិ​អង់គ្លេស ហើយក៏​រកបាន​គ្រាប់​បាល់​ផងដែរ ​ក្នុង​ជ័យជំនះ​លើ​ក្រុម​សាន់​ម៉ា​រី​ណូ ៥-០ ក្នុង​យុទ្ធនា​ការប្រកួត​ជំ​រុះ World Cup ២០២២ តំបន់​អឺរ៉ុប​។ Ollie Watkins, James Ward-Prowse, Raheem Sterling រកបាន​ម្នាក់ ១​គ្រាប់ ​ខណៈ​ខ្សែប្រយុទ្ធ Everton, Dominic Calvert-Lewin រកបាន​ ២​គ្រាប់​ម្នាក់ឯង​។​

​​ក្រុម​អង់គ្លេស​របស់លោក Gareth Southgate សំបូរ​ដោយ​កីឡាករ​ក្មេងៗ​មិនមាន​ការ​លំ​បា​កឡើ​យ​ ក្នុងការ​យកឈ្នះ​ក្រុម​ដែលមាន​លំដាប់​ថ្នាក់ទាប​ជាងគេ​របស់ FIFA ដើម្បី​ឈរលើ​គេ​ក្នុង​ពូ​ល I ជាមួយនឹង​អាល់​បា​នី​ដែល​យកឈ្នះ​នៅទឹកដី​អង់​ដូ​រ៉ា ១-០​។ ​​ងាក​ទៅ​អាល្លឺម៉ង់​ក៏​មិន​ភ្លាត់​ ៣​ពិន្ទុ​ដែរ​នៅពេល​ទទួលភ្ញៀវ​អ៊ី​ស្លង់​តាមរយៈ​ជ័យជំនះ ៣-០ ដែល​ធ្វើបាន​ដោយ Leon Goretzka, Kai Havertz ​និង Ilkay Gundogan​។ ​​អាល្លឺម៉ង់​ស្ថិតក្នុង​ពូ​ល J ឈរលើ​គេ​ក្នុង​ពូ​ល​មាន ៣ពិន្ទុ​ ជាមួយរ៉ូ​ម៉ា​នី​ដែល​បាន​យកឈ្នះ​ម៉ាស​ដូ​នី​ខាងជើង ៣-២ ខណៈ​អា​ម៉េ​នី​ក៏​រកបាន​ ៣​ពិន្ទុ​ដែរ​ក្រោយ​ឈ្នះ​នៅ​ទឹកដី​លិច​ហ្សែ​ន​ស្តែ​ន​។ ​​អាល្លឺម៉ង់​មុន​ប្រកួត​តែ​ប៉ុន្មាន​ម៉ោង​ប៉ុណ្ណោះ ​បាន​រកឃើញ​កីឡាករ​ ២​នាក់​របស់​ខ្លួន​ឆ្លង Covid-19 រួមមាន Jonas Hoffmann និង Marcel Halstenberg​។​

​​ចំណែកឯ​ជើងឯក​ពិភពលោក ២០០៦ អ៊ីតាលី​បាន​យកឈ្នះ​អៀក​ឡង់​ខាងជើង ២-០ ទទួលបាន ៣​ពិន្ទុ​ឈរ​លេខ២ ក្នុង​ពូ​ល C​។ ពីរ​គ្រាប់​នេះ​សំរេចបាន​ដោយ Domenico Berardi​ និង Ciro Immobile​។​ ​​ស្វ៊ី​ស​ដែល​ស្ថិតក្នុង​ពូ​ល C ដែរ​នោះបាន​យកឈ្នះ​នៅ​ទឹកដី​ប៊ុល​ហ្ការី ៣-១​។ ​​ផ្ទុយ​ពី​ក្រុម​ខ្លាំងៗ​ខាងលើ អេ​ស្ប៉ា​ញ​បាន​ខកខាន​ ៣ពិន្ទុ​ក្នុង​ទឹកដី​របស់ខ្លួន​ក្រោយ​ស្មើ​ក្រិ​ក ១-១​។ ​​ខ្សែប្រយុទ្ធ Juventus, Alvaro Morata​ រកបាន​ ១​គ្រាប់​មុន​តែ​ក្រិ​ក​តាម​ស្មើ​វិញ​នៅ​វគ្គ​ទី២ ដោយ​បាល់ ១១ម៉ែត្រ​របស់ Anastasios Bakasetas​។ ​​អេ​ស្ប៉ា​ញ​ស្ថិតក្នុង​ពូ​ល B នៃ​វគ្គ​ជំ​រុះ​បាន​ត្រឹម​ឈរ​លេខ៣ ក្នុង​ពូ​ល​ជាមួយ​ក្រិ​ក ​ខណៈ​ស៊ុយអែត​ឈរលើ​គេ​ក្រោយ​ឈ្នះ​ហ្ស​ក​ហ្ស៊ី ១-០​។ ​​Zlatan Ibrahimovic ​បង្ហាញខ្លួន​លើកដំបូង ​ក្រោយ​ត្រលប់​ពី​ចូលនិវត្តន៍​មកជួយ​ក្រុម​ជំ​រើ​ជាតិ​វិញ​ និង​រួមចំណែកបញ្ជូន​ ១គ្រា​ប់​ឲ្យ Viktor Claesson ​ស៊ុត​គ្រាប់​ជ័យជំនះ​នេះ​៕

អត្ថបទ​៖​នាង សុភា​វុ​ធ