ភ្នំពេញ ៖  លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការ ក្រសួងសុខាភិបាល បានអនុញ្ញាតិឱ្យលោក Takase Naoki អគ្គនាយកក្រុមហ៊ុន Gate Keeper Corporation Co., Ltd. និងលោក Koji Eguchi អគ្គនាយកក្រុមហ៊ុន MEDIROM Co., Ltd. ចូលជួបសំដែងការគួរសម និងពិភាក្សាការងារ, នៅទីស្តីការក្រសួងសុខាភិបាល ព្រឹកថ្ងៃទី១៤ ខែមិថុនា ឆ្នាំ២០២២នេះ។

​ជាកិច្ចចាប់ផ្តើម លោកជំទាវ វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានសម្តែងនូវការស្វាគមន៍ និងកោតសរសើរដល់ក្រុមហ៊ុនជប៉ុនទាំងពីរ ដែលមានបំណងវិនិយោគលើវិស័យសុខាភិបាលនៅកម្ពុជា។ លោកជំទាវរដ្ឋលេខាធិការបានជម្រាបជូនភ្ញៀវអំពីបទពិសោធន៍នៃការគ្រប់គ្រង ទប់ស្កាត់ ការរីករាលដាលជំងឺកូវីដ-១៩ នៅកម្ពុជាក្នុងរយៈពេលជាង២ឆ្នាំកន្លងមកនេះ ដែលជោគជ័យនេះកើតឡើង ពីការដឹកនាំដ៏ឈ្លាសវៃប្រកប ដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាអគ្គមេបញ្ជាការដឹកនាំ ចង្អុលបង្ហាញផ្ទាល់។ លោកជំទាវរដ្ឋលេខាធិការបានគូសរំលេចថា សម្តេចតេជោនាយករដ្ឋមន្រ្តី តែងតែលើកទឹកចិត្តឱ្យមានការចូលរួមពីផ្នែកវិស័យឯកជន ជាមួយរដ្ឋក្នុងការអភិវឌ្ឍប្រព័ន្ធសុខាភិបាលឱ្យដល់កម្រិតស្តង់ដារអន្តរជាតិ និងជំរុញការអភិវឌ្ឍធនធានមនុស្សផងដែរ។ 

លោកជំទាវវេជ្ជបណ្ឌិត យក់ សម្បត្តិ ក៏បានថ្លែងអំណរគុណ ដល់រដ្ឋាភិបាលនិងប្រជាជនជប៉ុន ដែលបានផ្តល់ជំនួយយ៉ាងច្រើន ដល់ក្រសួងសុខាភិបាលក្នុងប្រយុទ្ធប្រឆាំងនឹងជំងឺកូវីដ-១៩ ដែលអាចឱ្យកម្ពុជាបើកដំណើរការប្រទេស ឡើងវិញ។

ជាការឆ្លើយតបលោកអគ្គនាយកក្រុមហ៊ុន បានបង្ហាញឆន្ទៈក្នុងការគិតគូរវិនិយោគវិស័យថែទាំសុខភាព ដោយនាំយក បច្ចេកវិទ្យាសុខាភិបាលទំនើបៗមកចូលរួមចំណែកអភិវឌ្ឍន៍វិស័យសុខាភិបាលនៅកម្ពុជាឱ្យកាន់តែមានគុណភាព ប្រសិទ្ធភាព សុវត្ថិភាព និងឆ្លើយតបបានតាមតម្រូវការសុខភាពកាន់តែខ្ពស់របស់ប្រជាជនកម្ពុជា។

 លោកអគ្គនាយកក្រុមហ៊ុន MEDIROM បានសង្កត់ធ្ងន់ថា ក្រុមហ៊ុនមានការវិនិយោគជាមួយវិស័យសុខភាពឯកជន ដែលមានបទពិសោធន៍ធំនៃប្រទេសជប៉ុន និងមានសាខាជាង ២០០ នៅលើពិភពលោក ព្រមទាំងមានការសហការជាមួយក្រុមហ៊ុនធំៗរបស់ប្រទេសជប៉ុន។ ក្រុមហ៊ុនមានគោលបំណងបង្កើតមជ្ឈមណ្ឌលពហុព្យាបាលនៅកម្ពុជា ដោយដាក់បញ្ចូលប្រព័ន្ធបច្ចេកវិជ្ជាកម្រិតខ្ពស់ ដើម្បីចូលរួមចំណែកផ្តល់សេវាថែទាំសុខភាពកម្រិតខ្ពស់ និងកាន់តែមានភាពងាយស្រួលដល់ប្រជាជនកម្ពុជា ដើម្បីអាចផ្តល់សេវាសុខាភិបាលជូនអ្នកជំងឺប្រកបដោយទំនុកចិត្តខ្ពស់។

ជាការឆ្លើយតប លោកជំទាវរដ្ឋលេខាធិការបានស្វាគមន៍ និងគាំទ្រចំពោះគំនិតផ្តួចផ្តើមក្នុងការវិនិយោគ វិស័យសុខាភិបាលនៅកម្ពុជា ប៉ុន្តែលោកជំទាវរដ្ឋលេខាធិការបានស្នើសុំភាគីមិត្តជប៉ុន រៀបចំជាផែនការមួយច្បាស់លាស់ និងគ្រប់ជ្រុងជ្រោយ។ ជាចុងក្រោយ លោកជំទាវរដ្ឋលេខាធិការ បានថ្លែងអំណរគុណក្រុមហ៊ុនទាំងពីរ និងសូមបញ្ជូនផែនការមកក្រសួងសុខាភិបាលឱ្យបានលឿនតាមដែលអាចធ្វើបាន។ កិច្ចជំនួបពិភាក្សាបានបញ្ចប់ដោយលទ្ធផលគួរជាទីមោទនៈក្នុងស្មារតីសាមគ្គីភាព មិត្តភាពនិងកិច្ចសហប្រតិបត្តិការ ៕​ អត្ថបទ ៖ រដ្ឋា