កោះកុង៖ ក្រសួងទេសចរណ៍ បានផ្តល់ពាន និងប័ណ្ណសរសើរជូនដល់ម្ចាស់អាជីវកម្មសេវាកម្ម​ទេសចរណ៍ ភោជនីយដ្ឋាន និងអាហារដ្ឋានចំនួន៥៦នាក់ នៅក្នុងក្រុងខេមរភូមិន្ទ ខេត្តកោះកុង ពីវិស័យបរិស្ថានគ្មានផ្សែងបារីដំណាក់កាល ជំងឺកូវីដ១៩ កន្លងទៅ។

បរិស្ថានគ្មានផ្សែងបារី ក្នុងវិស័យទេសចរណ៍ មិនត្រឹមតែចូលរួមលើកកម្ពស់​សុខុមាលភាព​របស់​ប្រជា​ពលរដ្ឋ ​និងទេសចរប៉ុណ្ណោះទេ ថែមទាំងចូលរួមកាត់បន្ថយឱកាសនៃការឆ្លងរីករាលដាល​នៃជំងឺកូវីដ-១៩ តាមរយៈការយកដៃមិនស្អាតទៅប៉ះមាត់នៅពេលជក់បារី និងការខូចខាត​សួត​ដោយសារផ្សែងបារី។

បរិស្ថានគ្មានផ្សែងបារីក្នុងវិស័យទេសចរណ៍ក៏បានចូលរួមចំណែកយ៉ាងសំខាន់ក្នុងធានាបានថា កម្ពុជា គឺជាគោលដៅទេសចរណ៍សុវត្ថិភាព ស្អាត និងបៃតងផងដែរ។

នេះជាការលើកឡើងរបស់ឯកឧត្តម ហោ សារុន រដ្ឋលេខាធិការក្រសួងទេសចរណ៍​ក្នុង​បើក​សិក្ខាសាលា និងពិធីចែកពាន បរិស្ថានគ្មានផ្សែងបារីក្នុងវិស័យទេសចរណ៍ដំណាក់កាលកូវីដ១៩ នៅថ្ងៃទី១៤ ខែមិថុនា ឆ្នាំ២០២២។

ឯកឧត្តម ហោ សារុន គូសបញ្ជាក់ទៀតថា ការផ្តល់ពាន និងប័ណ្ណសរសើរដល់ម្ចាស់អាជីវកម្ម ៥៦​កន្លែង​លើសេវាកម្មទេសចរណ៍ ​ភោគជនីយដ្ឋាន និងអាហារដ្ឋាននេះក្នុងន័យកិច្ចសហការ​អនុវត្តរបស់​អ្នកពាក់ព័ន្ធ​បានល្អពីទប់ស្កាត់ការជក់បារីតាមតំបន់ទេសចរណ៍ដែលត្រូវហាមប្រាម។

គួរជម្រាបថា ​ផលប៉ះពាល់​ និងគ្រោះថ្នាក់ដែលបណ្តាលមកពីការប្រើប្រាស់​ផលិតផលថ្នាំជក់ មាន​ទំហំធំធេង​ចំពោះសុខភាពសាធារណៈ​ ក៏ដូចជាសង្គម ​និងសេដ្ឋកិច្ច ទើបមាន​ការ​គិតគូរ​យកចិត្តទុក​ដាក់ពីរាជរដ្ឋាភិបាល​ ក្រសួងសុខាភិបាលដែលជាស្ថាប័នជំនាញ រហូតដល់មានច្បាប់​ស្តីពីការ​ត្រួត​ពិនិត្យផលិតផលថ្នាំជក់ អនុក្រឹត្យ ប្រកាស និងសេចក្តីណែនាំនានា៕ អត្ថបទ៖ ឈឹម មករា