ភ្នំពេញ៖ ប្រទេសជាសមាជិកអាស៊ាន និងប្រទេសជាដៃគូមួយចំនួនទៀត ​បានជួបពិភាក្សា និងធ្វើបទបង្ហាញដល់គ្នាលើការដោះស្រាយបញ្ហា នៃសំណល់​យុទ្ធភណ្ឌ​មិនទាន់ផ្ទុះ នៅក្នុងតំបន់អាស៊ាន​ ដែលនឹងជួយនាំឲ្យសម្រេចបាននូវគោលដៅ ឆ្នាំ២០២៥ខាងមុខ ។

ក្នុងសិក្ខាសាលាថ្នាក់តំបន់ ស្តីពីក្របខ័ណ្ឌគ្រប់គ្រងហានិភ័យ សំណល់យុទ្ធភ័ណ្ឌមិនទាន់ ផ្ទុះ សម្រាប់តំបន់អាស៊ីអាគ្នេយ៍ រយៈពេល៣ថ្ងៃ ចាប់ពីថ្ងៃទី១៤ ដល់១៦ ខែមិថុនា ឆ្នាំ២០២២ រៀបចំ​ដោយមជ្ឈមណ្ឌលតំបន់អាស៊ានសម្រាប់វិស័យសកម្មភាពមីន (ARMAC) និងមជ្ឈមណ្ឌល​អន្តរជាតិ​ហ្សឺណែវ សម្រាប់ការបោសសម្អាតមីនមនុស្សធម៌ (GICHD) ព្រមទាំងមានការ​ឧបត្ថម្ភគាំទ្រ​ដោយ​រដ្ឋាភិបាលសហរដ្ឋអាមេរិក រដ្ឋាភិបាលប្រទេសស្វីស ។

លោក ព្រំ ស៊ុនប្រាសិត នាយកប្រតិបត្តិ ARMAC លើកឡើងថា លទ្ធផលនៃកិច្ចប្រជុំ នឹងជួយគាំទ្រ​ដល់គោលដៅរបស់អាស៊ានជារួម ដើម្បីក្លាយ​ទៅជាសហគមន៍​ដែលមានចីរភាព កសាង​នូវ​សន្តិភាព​ក្នុងតំបន់ ជាផែនការមេរបស់អាស៊ាន ។

ក្នុងឱកាសអញ្ជើញបើកសិក្ខាសាលានេះ ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានស្នើដល់អង្គសិក្ខាសាលាទាំងមូលរាល់កិច្ចពិភាក្សា ​និងការកំណត់​អត្តសញ្ញាណ​ហានិភ័យនានា ដែលនៅសេសសល់​ ត្រូវផ្តោតថា យើងកំពុងធ្វើការដើម្បីប្រជាជន​ និងជាបេសកកម្មមនុស្សធម៌ ដើម្បី​ធ្វើឲ្យមនុស្សគ្រប់រូបមាន​សុវត្ថិភាព ​និងអាចប្រើប្រាស់ដីដោយគ្មានការភ័យខ្លាច ។

ជាមួយនេះ ​ឯកឧត្តម ​បានរំលេចនូវប្រវត្តិរបស់ប្រទេសកម្ពុជា ​ដែលបានបញ្ចប់សង្រ្គាមទាំងស្រុង​នៅឆ្នាំ១៩៩៨​ ប្រជាជនកម្ពុជា​ទាំងអស់​ ទទួលបាននូវសុខសន្តិភាពពេញលេញ ប៉ុន្តែទោះបី​យ៉ាង​ណា​ប្រជាជនមួយចំនួន នៅតែបន្តរស់នៅក្នុងតំបន់ដ៏សែនគ្រោះថ្នាក់​ ក្នុងភាពភ័យខ្លាច និងធ្វើការ​នៅតំបន់ដែលមានការផលប៉ះពាល់ដោយគ្រាប់មីន​ និងសំណល់ជាតិផ្ទុះ ។

ឯកឧត្តម បានបន្តថា សកម្មភាពមីនមនុស្សធម៌ បានចូលរួមចំណែកយ៉ាងសំខាន់ក្នុងការ​អភិវឌ្ឍ​សេដ្ឋកិច្ចសង្គមនៅកម្ពុជា​ ដោយធានាបាននូវដីមានសុវត្ថិភាព សម្រាប់​សកម្មភាពចិញ្ចឹម​ជីវិត​របស់​សហគមន៍មូលដ្ឋាន ​និងការអភិវឌ្ឍសេដ្ឋកិច្ចប្រកបដោយនិរន្តរភាព​ ទន្ទឹមនឹងនោះ​ក៏កាត់បន្ថយ​ចំនួន​ជន​រងគ្រោះដោយសារមីន ​និងសំណល់ជាតិផ្ទុះពីសង្រ្គាមផងដែរ ។

ឯកឧត្តមទេសរដ្ឋមន្ត្រី លី ធុជ បានបន្ថែមថា រដ្ឋាភិបាលកម្ពុជា ​តាមរយៈអាជ្ញាធរមីន និងដៃគូ​សកម្មភាព​មីន ​បាននឹងកំពុងធ្វើការឥតឈប់ឈរ ដើម្បីសម្រេចបាននូវគោលដៅ​របស់ខ្លួនក្នុង​ឆ្នាំ២០២៥ និងលុបបំបាត់នូវហានិភ័យទាំង​អស់នោះ ដែល​ត្រូវគ្រប់គ្រង​ឲ្យបានតាមរបៀប​ដែល​អាចធ្វើ​ទៅបានក្នុងគោលដៅរួម ​ដើម្បីសុខសុវត្ថិភាព​របស់ប្រជាជនគ្រប់រូប និងឲ្យប្រជាជនអាច​រស់នៅ​ដោយគ្មានភាពភ័យខ្លាច ៕ អត្ថបទ បាន សុខរិទ្ធិ