ភ្នំពេញ៖ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា នៅថ្ងៃទី ១៤ មិថុនា បានទទួលជួបសវនាការ និងទទួលអំណោយភួយចំនួន ១ពាន់ភួយ ពីលោកស្រី Anna Hsieh, President of Rotary Club of Angkor ដែលពិធីនេះប្រព្រឹត្តទៅ នៅអគារទីស្នាក់ការកណ្តាល កាកបាទក្រហមកម្ពុជា។

ក្នុងនាមកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន, លោកជំទាវអគ្គលេខាធិការ បានថ្លែងអំណរគុណយ៉ាងជ្រាលជ្រៅ ចំពោះលោកស្រី Anna Hsieh ដែលតែងតែឧបត្ថម្ភអំណោយ ដល់កាកបាទក្រហមកម្ពុជា ក៏ដូចជាសាខាកាកបាទក្រហមកម្ពុជា ខេត្តសៀមរាប ជាបន្តបន្ទាប់ ដើម្បីចូលរួមចំណែកដោះស្រាយបញ្ហាប្រឈមនានា និងបន្តពង្រឹងភាពធន់ក្នុងសហគមន៍។

លោកជំទាវឱ្យដឹងទៀតថា ក្នុងកាយវិកាដ៏មនុស្សធម៌នេះ គឺជាការចូលរួមរបស់សប្បុរសជន ជាមួយសកម្មភាពមនុស្សធម៌ របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។

កាកបាទក្រហមកម្ពុជា នឹងប្រើប្រាស់ នូវអំណោយទាំងនេះឱ្យចំគោលដៅមនុស្សធម៌ ដោយមិនប្រកាន់ពូជសាសន៍ ពណ៌សម្បុរ រឺនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការ របស់ចលនាអន្តរជាតិកាកបាទក្រហម អឌ្ឍចន្ទក្រហម។

សូមបញ្ជាក់ថា ភួយទាំងអស់នេះ កាកបាទក្រហមកម្ពុជាថ្នាក់កណ្តាល នឹងធ្វើការចែកជូនដល់អ្នកជំងឺ ដែលកំពុងសម្រាកព្យាបាល នៅមន្ទីរពេទ្យកុមារអង្គរខេត្តសៀមរាប នាពេលឆាប់ៗខាងមុខនេះ និងចែកជូនដល់អ្នកងាយរងគ្រោះបំផុត ដែលជាមុខសញ្ញាអាទិភាព របស់កាកបាទក្រហមកម្ពុជា ផងដែរ៕ ​