ភ្នំពេញ៖ តាមផែនការគ្រោងទុក នៅឆ្នាំ២០២៣ខាងមុខនេះ ច្បាប់ស្តីពីសុវត្ថិភាពម្ហូបអាហារមានចំនួន គ្រោងនឹងដាក់ ឲ្យអនុវត្តជាផ្លូវការ ដើម្បីធានាដល់ការការពារសុខភាព និងអាយុជីវិតរបស់ប្រជាពលរដ្ឋគ្រប់រូប តាមរយៈការទទួល ទាន អាហារ ប្រកបដោយគុណភាព សុវត្ថិភាព ដែលបណ្តាឲ្យកើតមានជំងឺផ្សេងៗ ព្រមទាំងអត្ថប្រយោជន៍ មួយចំនួន ផ្សេងទៀត។

​នៅក្រោយវេទិកាសុវត្ថិភាពម្ហូបអាហារ កាលពីព្រឹកថ្ងៃទី១៤ ខែមិថុនា ឆ្នាំ២០២២នេះ ឯកឧត្ដម ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្រ្កាបការក្លែងបន្លំ បានដឹកនាំកិច្ចប្រជុំប្រចាំសប្ដាហ៍របស់អគ្គនាយកដ្ឋាន (ក.ប.ប.) នៃក្រសួងពាណិជ្ជកម្ម បានមានប្រសាសន៍ប្រាប់បណ្តាញអ្នកសារព័ត៌មានថា អគ្គនាយកដ្ឋាន នឹងខិតខំកសាងបទប្បញ្ញត្តិក្រោមច្បាប់ឲ្យបានលឿនបំផុតក្នុងរយៈពេល៦ខែក្រោយនេះ គឺធ្វើយ៉ាងណារៀបចំតាក់តែងលក្ខខណ្ឌតម្រូវមួយចំនួន ដែលជាគម្រោងអនុក្រឹត ការតាក់តែងលក្ខខណ្ឌមួយចំនួនដែលប្រកាសរួម ដើម្បីយកទៅអនុវត្តច្បាប់នេះតែម្តង។

​ឯកឧត្តមប្រតិភូ លើកឡើងបន្តថា រដ្ឋាភិបាលដើរតួនាទីយ៉ាងសំខាន់ក្នុងការផ្សព្វផ្សាយ និងពង្រឹងច្បាប់ និងបទ ប្បញ្ញត្តិស្តីពីការការពារមនុស្ស សត្វ សុខភាពរុក្ខជាតិ និងបរិស្ថាន ខណៈពេលដែលបង្កើតបរិយាកាស អំណោយផលសម្រាប់អាជីវកម្ម។

ពាក់ព័ន្ធការរៀបចំវេទិកាថ្ងៃនេះ លោកស្រី Maria Theresa S.Medialdia នាយកផ្នែកអភិវឌ្ឍន៍កសិកម្ម នៃវិទ្យាស្ថានមេគង្គ បានបញ្ជាក់ថា ដើម្បីចែករំលែកស្ថានភាពទាន់សម័យនៃវិស័យកសិ-ម្ហូបអាហារ រួមទាំងយុទ្ធសាស្រ្តក្នុងវិស័យសាធារណៈស្តីពីការពង្រីកការនាំចេញវិស័យកសិ-ម្ហូបអាហារទៅកាន់ទីផ្សារអន្តរជាតិ កាន់តែ ទូលំទូលាយ ព្រមទាំងការធ្វើបច្ចុប្បន្នភាពសំខាន់ៗស្តីពីវិធានការមិនពន្ធ និងការអនុលោមតាមតម្រូវការហេដ្ឋារចនាសម្ព័ន្ធ និងគ្រឿងបរិក្ខារ និងដើម្បីកំណត់នូវការគាំទ្រសំខាន់ៗដែលត្រូវការក្នុងចំណោមសហគ្រាស ធុនតូច និងមធ្យមផ្នែកកសិកម្មកសិកម្ម ដើម្បីពង្រីកសក្តានុពលនាំចេញ។

សូមជម្រាបជូនថា ច្បាប់ស្តីពីសុវត្ថិភាពម្ហូបអាហារ មានចំនួន ១១ជំពូក និង៤៣មាត្រា។ ច្បាប់នេះ ជាការទទួលខុសត្រូវរួម និងមានលក្ខណៈពហុវិស័យ ដែលចាំបាច់តម្រូវឱ្យមានការចូលរួមពីក្រសួង ស្ថាប័ន និងភាគីពាក់ព័ន្ធ ក្នុងការអនុវត្តការគ្រប់គ្រង សម្របសម្រួល និងត្រួតពិនិត្យគុណភាព សុវត្ថិភាពម្ហូបអាហារ នៅតាមគ្រប់ដំណាក់កាលនៃខ្សែសង្វាក់ផលិតកម្ម។

ក្រៅពីនោះ សេចក្តីព្រាងច្បាប់ស្ដីពីសុវត្ថិភាពម្ហូបអាហារ នឹងបង្កលក្ខណៈឱ្យប្រទេសកម្ពុជារៀបចំនូវប្រព័ន្ធសុវត្ថិភាព ម្ហូបអាហារដែលមានលក្ខណៈទំនើប តាមរយៈការកសាងវិធីសាស្រ្តទប់ស្កាត់ជាមុន និងការត្រួតពិនិត្យខ្សែសង្វាក់ ផលិតកម្ម ប្រសើរជាងការត្រួតពិនិត្យ និងវិភាគលើផលិតផលសម្រេច ដែលជាគោលការណ៍មួយយ៉ាងសំខាន់ក្នុង ការជំរុញផលិតផលកម្ពុជា ឱ្យមានការទទួលស្គាល់ក្នុងទីផ្សារពិភពលោ‍ក៕ អត្ថបទ៖ ឈិត បូរ៉ាវី