បាល់ទះ៖ កីឡាករបាល់ទះក្នុងសាលជម្រើសជាតិកម្ពុជា វឿន វាសនា នឹងត្រូវធ្វើដំណើរទៅវៀតណាមនៅថ្ងៃទី១៥ ខែមិថុនានេះដើម្បីលេងឲ្យក្លិប Long An នៃលីគកំពូលបាល់ទះវៀតណាម បន្ទាប់ពីក្លិបក៏ដូចជាសហព័ន្ធកីឡាបាល់ទះកម្ពុជាបានឈានដល់កិច្ចព្រមព្រៀងផ្លូវការ ជាមួយតម្លៃខ្លួនខ្ទង់ម៉ឺនដុល្លារសម្រាប់ការលេងរយៈពេល ២សប្ដាហ៍ប៉ុណ្ណោះ។
ជាមួយការត្រៀមចេញទៅលេងនៅវៀតណាមនេះ វឿន វាសនា បានសម្ដែងការសប្បាយចិត្តជាខ្លាំង ហើយគេបានប្ដេជ្ញានឹងខំប្រឹងដើម្បីអភិវឌ្ឍន៍ខ្លួនឯងផង ដើម្បីនាំមកនូវបទពិសោធន៍ និងបច្ចេកទេសថ្មីៗចែករំលែកដល់មិត្តរួមក្រុម នៃក្រុមបាល់ទះជម្រើសជាតិកម្ពុជាផង សម្រាប់ត្រៀមដំណើរឆ្ពោះទៅស៊ីហ្គេមឆ្នាំ២០២៣។ ម្យ៉ាង វាសនា ក៏ចាត់ទុកការលេងឲ្យក្លិបនៅវៀតណាមនេះជាឱកាសឆ្ពោះទៅសម្រេចក្ដីស្រមៃ ដែលគេចង់បន្ដលេងនៅឥណ្ឌូនេស៊ី និងជប៉ុនផងដែរ។ ទន្ទឹមជាមួយគ្នាលោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានអបអរសាទរចំពោះកីឡាករ វឿន វាសនា ដែលបានចេញទៅប្រកបអាជីពលើឆាកអន្ដរជាតិ ហើយលោកបានចាត់ទុកនេះគឺជាកត្ដាជំរុញទឹកចិត្តដល់កីឡាករឲ្យខិតខំប្រឹងប្រែង ដើម្បីមានឱកាសដូច វាសនា អមជាមួយការទទួលបាននូវអត្ថប្រយោជន៍ និងតម្លៃខ្លួនខ្ពស់។ លោកថា ចំពោះកីឡាករជម្រើសជាតិដែលទើបចូលរួមប្រកួតស៊ីហ្គេមនៅវៀតណាម ក្រៅពី វាសនា គឺមានកីឡាករ ៥-៦រូបទៀតក៏មានក្លិបបរទេសទាក់ទងដែរតែក្លិបមិនអនុញ្ញាត ព្រោះភាគច្រើនចង់បានកីឡាករកម្ពុជាទៅលេងជាលក្ខណៈលីគរយៈពេលវែង។
សូមបញ្ជាក់ថា កីឡាករ វឿន វាសនា បានផ្ដើមអាជីពបាល់ទះដំបូងក្នុងក្របខណ្ឌសិស្សវិទ្យាល័យ ហើយបានបន្ដចូលរួមហ្វឹកហាត់ជាមួយក្រុមបាល់ទះស្នងការដ្ឋាននគរបាលខេត្តបាត់ដំបង មុនចូលរួមជាមួយក្លិបអាជីពគឺក្លិបបាល់ទះវិសាខានៅឆ្នាំ២០១៧។ ថ្មីៗនេះ វាសនា បានរួមចំណែកយ៉ាងសំខាន់ជាមួយមិត្តរួមក្រុម ក្នុងការជួយក្រុមបាល់ទះជម្រើសជាតិកម្ពុជាបំបែកកំណត់ត្រាប្រវត្តិសាស្ដ្រ ដណ្ដើមបានមេដាយសំរឹទ្ធលើកដំបូងក្នុងព្រឹត្តិការណ៍ស៊ីហ្គេម លើកទី៣១ នៅប្រទេសវៀតណាម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
