​បាល់ទាត់៖ ​ក្រុមបាល់ទាត់​ជំរើសជាតិ​កូ​ស្តា​រី​កា បាន​ក្លាយជា​ក្រុម​ចុងក្រោយ​គេ​បង្អស់​ដែល​កក់​កៅអី World Cup 2022 ប្រទេស​កាតា​បន្ទាប់ពី​យ​ក​ឈ្នះ​នូ​វែ​ហ្ស៊ី​ឡង់ ១-០ ក្នុង​វគ្គ Play-Off អន្តរទ្វីប​រវាង​អាមេរិក​កណ្តាល និង​អូ​សេ​អា​នី​។

​​ក្រុម​កូ​ស្តា​រី​កា​រកបាន​គ្រាប់​ជ័យជំនះ​តាំងពី​នាទី​ទី៣ ដោយ​អតីត​ខ្សែប្រយុទ្ធ Arsenal, Joel Campbell មុនពេល​ដែល​នូ​វែ​ហ្ស៊ី​ឡង់​សល់​គ្នា​តែ ១០នាក់​ពោលគឺ​នាទី​ទី៦៩ កីឡាករ​បម្រុង Kosta Barbarouses ទទួលបាន​កាត​ក្រហម​ក្រោយ​កំហុស​លើ Francisco Calvo​។​ ​​ជ័យជំនះ​ធ្វើឱ្យ​កូ​ស្តា​រី​កា​ដែលមាន​ចំណាត់ថ្នាក់​លេខ ៣១ ពិភពលោកឡើងទៅ​ក្នុង​ពូ​ល E ដែល​នឹងត្រូវ​ប្រឈម​ជាមួយ​ក្រុម​ខ្លាំងៗ​រួមមាន​អាល្លឺម៉ង់ អេ​ស្ប៉ា​ញ និងជប៉ុន​។ ​​សូមបញ្ជាក់ថា កូ​ស្តា​រី​កា​នឹង​បង្ហាញខ្លួន​នៅ​ព្រឹត្តិការណ៍​បាល់ទាត់​ពិភពលោក​លើក​ទី៦ ហើយ​ជា​លើក​ទី ៣ផ្ទួនៗ​គ្នា​ផងដែរ​។

​​ស្ថិតិ​ល្អ​បំផុត​របស់​កូ​ស្តា​រី​កា​នៅ World Cup គឺ​កាលពី​ឆ្នាំ២០១៤ លើ​ទឹកដី​ប្រេ​ស៊ី​ល​ដែល​ពួកគេ​ឡើងដល់​វគ្គ ៨ក្រុម​ចុងក្រោយ បន្ទាប់ពី​ឈរលើ​គេ​ក្នុង​ពូ​ល​ពីលើ​ក្រុម​ខ្លាំងៗ​រួមមានអ៊ុយ​រូ​ហ្កា​យ អ៊ីតាលី និង​អង់គ្លេស មុនពេល​យកឈ្នះ​ក្រិ​កនៅ​វគ្គ ១៦ក្រុម​ចុងក្រោយ​ដោយ​បាល់ ១១ម៉ែត្រ​កាត់សេចក្តី និង​ចាញ់​ហូ​ឡង់​នៅ​វគ្គ ៨ក្រុម​ចុងក្រោយ​ដោយ​បាល់ ១១ម៉ែត្រ​ដូចគ្នា​។ ​​ចំណែក​នូ​វែ​ហ្ស៊ី​ឡង់​នឹង​បន្ត​អវត្តមាន​ពី World Cup ថែម​បួន​ឆ្នាំ​ទៀត​បន្ទាប់​បង្ហាញខ្លួន​ចុងក្រោយ​បំផុត​តាំងពី​ឆ្នាំ២០១០ នៅ​ទឹកដី​អាហ្វ្រិក​ខាងត្បូង​៕

​អត្ថបទ​៖​នាង សុភា​វុ​ធ