ភ្នំពេញ៖ បន្ទាប់ពីខកខានអស់រយៈពេល ២ឆ្នាំមកនេះ ដោយសារការរីករាលដាលនៃជំងឺកូវីដ១៩ នៅថ្ងៃទី១៥ ខែមិថុនានេះ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំ​ទិវាជាតិអប់រំ​បណ្តុះបណ្តាល​បច្ចេក​ទេស និងវិជ្ជាជីវៈ (TVET Day) នៅអគារពិព័រណ៌ពាណិជ្ជកម្មកោះពេជ្រ រាជធានីភ្នំពេញ ក្រោមប្រធានបទ “ធីវ៉េត បង្កើនផលិតភាពកាងារនិងភាពប្រកួតប្រជែងខ្ពស់”។

ពិធីនេះបានប្រាព្ធធ្វើឡើង​ក្រោមអធិបតីភាព​ឯក​ឧត្តម​បណ្ឌិត​ អ៊ិត សំហេង រដ្ឋមន្រ្តីក្រសួងការងារ និង​បណ្តុះបណ្តាលវិជ្ជាជីវៈ និង​មាន​ការ​អញ្ជើញ​ចូមរួម​ ​ពីតំណាង​អង្គការ​អន្តរជាតិ​ ខាង​ការងារ​(ILO) និងដៃគូពាក់ព័ន្ធនានា និង​សិស្សនិស្សិត​មក​ពី​សាលា​បណ្តុះបណ្តាល​ជំនាញ​រាប់ពាន់​នាក់។

សូមបញ្ជាក់ថា នេះជាលើ​ក​ទី៥ហើយ ដែលក្រសួងការងារ និងបណ្តុះបណ្តាលវិជ្ជាជីវៈ រៀបចំ​ឡើង​ទិវាជាតិនេះឡើង ក្នុងគោលបំណងដើម្បីលើកកម្ពស់ និងផ្សព្វផ្សាយទៅដល់សិស្ស-និស្សិត យុវជន អាណាព្យាបាលនិងផ្នែកឯកជន ឱ្យបានដឹង និង​យល់​អំពី​សារៈសំខាន់​ការ​បណ្តុះបណ្តាល​ជំនាញ​ប្រកបដោយគុណភាព និងប្រសិទ្ធិភាព​ឱ្យ​ឆ្លើយតប​ទៅ​នឹង​តម្រូវ​ការ​ទីផ្សារ​ការងារ​ទាំង​ក្នុង​ និង​ក្រៅប្រ​ទេស៕