​សហភាព​អឺរ៉ុប៖ ប្រធាន​គណៈកម្មការ​អឺរ៉ុបលោកស្រី Ursula von der Leyen កាលពី​ថ្ងៃ​អង្គារ​បាន​បង្ហាញក្តី​សង្ឃឹមថា ការផ្គត់ផ្គង់​ឧស្ម័ន​ធម្មជាតិ​ពី​តំបន់​សមុទ្រ​មេ​ឌី​ទែ​រ៉ា​ណេ​ភាគ​ខាងកើត ​អាចជួយ​កាត់បន្ថយ​ការពឹងផ្អែក​របស់​សហ​ភាព​អឺរ៉ុប​លើ​ប្រទេស​រុស្ស៊ី​ ខណៈ​សង្គ្រាម​អ៊ុយ​ក្រែ​ន​អូស​បន្លាយពេល​។​

​លោកស្រី Von der Leyen បាន​និយាយ​នៅក្នុង​សេចក្តីថ្លែងការណ៍​រួម ជាមួយនាយករដ្ឋមន្ត្រីអ៊ីស្រាអែលលោក Naftali Bennett នូវ​កិច្ចព្រមព្រៀង​រវាង​សហភាព​អឺរ៉ុប​ថា អ៊ីស្រាអែល និងអេ​ហ្ស៊ី​ប​នឹងត្រូវ​ចុះហត្ថលេខា​នៅ​ថ្ងៃ​ពុធ​នេះ ក្នុង​គោលបំណងជួយ​បង្កើន​ការ​ចែកចាយ​ថាមពលទៅកាន់​អឺរ៉ុប​។​ ​អ៊ីស្រាអែល​បានក្លាយ​ជា​ប្រទេស​នាំចេញ​ឧស្ម័នក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ បន្ទាប់ពី​ការរកឃើញ​នៅ​សមុទ្រ ហើយ​បាន​ចុះហត្ថលេខា​លើ​កិច្ចព្រមព្រៀងប្រកបដោយ​ម​ហិ​ច្ឆិ​តា​ជាមួយប្រទេសក្រិច និង​ស៊ី​ប ដើម្បី​សាងសង់​បំពង់​បង្ហូរ​ប្រេង​រួមគ្នា​។

ការផ្គត់ផ្គង់​ថ្មី​អាច​នឹង​ជួយ​អឺរ៉ុប​បង្កើនការដាក់ទណ្ឌកម្ម​លើ​ទីក្រុង​មូ​ស្គូ​។ កាលពី​ឆ្នាំមុន សហភាព​អឺរ៉ុប​បាន​នាំចូល​ឧស្ម័ន​ប្រមាណ 40% ពីប្រទេស​រុស្ស៊ី​។ ​បណ្តា​ប្រទេស​នានា​កំពុង​ព្យាយាម​កាត់បន្ថយ​ការពឹងផ្អែក​នេះ ដើម្បី​ដាក់ទណ្ឌកម្ម​លើប្រទេស​រុស្ស៊ី​ជុំវិញ​ការវាយលុកជា​បន្តបន្ទាប់​របស់ខ្លួន​លើ​អ៊ុយ​ក្រែ​ន​។​ ​ប្រទេស​អ៊ីស្រាអែល​មាន​ទីតាំង​ឧស្ម័ន​សំខាន់​ចំនួន​ពីរ​នៅ​សមុទ្រ​របស់ខ្លួន​ ដែល​អាច​ទទួលបាន​ឧស្ម័ន​ធម្មជាតិ​ប្រមាណ 690ពាន់​លាន​ម៉ែត្រគូប​រួមបញ្ចូល​គ្នា ហើយនឹង​បន្ត​រុករក​បន្ថែមទៀត៕

អត្ថបទ៖ ប៊ុនថន