ភ្នំពេញ៖ ស្ថានភាពទឹកភ្លៀងធ្លាក់ខ្លាំងជាបន្តបន្ទាប់ ត្រឹមរយៈពេល៥ខែ ឆ្នាំ២០២២នេះ បានធ្វើឲ្យប៉ះពាល់ដល់ខេត្តមួយចំនួន និងបណ្ដាលឲ្យស្រូវរបស់កសិករចំនួនជាង ៣ ៥០០ហិកតា រងការខូចខាត និងលិចលង់ផ្ទះរបស់ពលរដ្ឋមួយចំនួនផងដែរ ។

នៅក្នុងរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ភ្លៀងកក់ខែក្នុងរដូវប្រាំង បានបន្តធ្លាក់រាយប៉ាយ ចាប់ពីដើមខែមេសា តាមបណ្តាខេត្តជាច្រើន ក្នុង​បរិមាណតិចច្រើនដោយកន្លែង ហើយខេត្តមួយចំនួនមានភ្លៀងធ្លាក់ ​ក្នុងបរិមាណពី៧០ ទៅ១០០មីលីម៉ែត្រ ។

របាយការណ៍ បានបន្តថា បញ្ហានេះ បានធ្វើឲ្យខេត្តមួយចំនួនរងផលប៉ះពាល់ខ្លាំង ក្នុននោះមាន ខេត្តឧត្តរមានជ័យ ព្រះវិហារ បន្ទាយមានជ័យ កំពង់ធំ សៀមរាប បាត់ដំបង ត្បូងឃ្មុំ និងខេត្តរតនគិរីជាដើម ខណៈនៅខេត្តបន្ទាយមានជ័យ ទឹកភ្លៀងធ្វើឲ្យលិចស្រូវចំនួនជាង ៤ ៦០០ហិកតា រងការខូចខាតចំនួនជាង ២ ៥០០ហិកតា​ ដោយឡែកខេត្តត្បូងឃ្មុំ ប៉ះពាល់ស្រូវជាង ១ ៣០០ហិកតា និងខូចខាតជាង ១ ១០០ហិកតា ។

ប្រភពបន្ថែមថា បញ្ហាទឹកភ្លៀងធ្លាក់ខ្លាំងនេះ បានធ្វើឲ្យបាក់ដាច់ទំនប់អាងស្តុកទឹក របស់ក្រុមហ៊ុន​ចំការចេកហ័ងអាញ់ ក្នុងឃុំស្រែអង្រ្កង ស្រុកកូនមុំ ខេត្តរតនគិរី បណ្តាលឱ្យលិចផ្ទះកម្មករ ៧ល្វែង ស្មើនឹង១៥០បន្ទប់ និងតូបលក់ទំនិញ២ បាក់ដាច់ស្ពានឈើ ១កន្លែង និង​ជម្លៀស​កម្មករ​ទៅទីទួល​សុវត្តិភាព​ចំនួន ១៧៦គ្រួសារ ស្មើ៥៧០នាក់ ។

បើតាមរបាយកាណ៍របស់ក្រសួងកសិកម្ម រុក្ខាប្រមាញ់ និងនេសាទ​ បានឲ្យដឹងថា ស្ថានភាព​ទឹក​ភ្លៀងធ្លាក់ច្រើននៅដើមរដូវវស្សា (ពាក់កណ្តាលខែមេសា ដល់ឧសភា) បង្កការលំបាក​ដល់​ការបង្ក​បង្កើនផល ជាពិសេសដំណាំស្រូវ​នៅតំបន់វាលទំនាប​ ប៉ុន្តែក្នុងខែមិថុនានេះ ស្ថានភាព​ទឹកភ្លៀង​បានធ្លាក់តិចតួច ​ជាឱកាស​ឲ្យ​កសិករគ្រប់តំបន់​ខិត​ខំដាំដុះស្រូវ​ និងដំណាំផ្សេងៗបាន​យ៉ាង​ល្អប្រសើរ ។

ក្រសួងធនធានទឹក និងឧតុនិយម ​កាលពីថ្ងៃទី១៤ ខែមិថុនា ឆ្នាំ២០២២​ បានឲ្យដឹងថា កម្ពុជា​បន្ត​ទទួល​ឥទ្ធិពលពីជ្រលង នៃប្រព័ន្ធសម្ពាធទាប ​ដែលអូសបន្លាយនៅលើភាគខាងជើងប្រទេសថៃ ប្រទេសឡាវ ​និងវៀតណាម​ ជាមួយនឹងខ្យល់​មូសុង​និរតី​បក់ក្នុង​ល្បឿនមធ្យម ​ដែលស្ថានភាពនេះ​នឹងធ្វើឲ្យកម្ពុជា​ ចាប់ពីថ្ងៃទី១៥ ដល់ទី២១ ខែមិថុនា ​មានភ្លៀងធ្លាក់ពីកម្រិតខ្សោយ​ ទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់ ៕ អត្ថបទ បាន សុខរិទ្ធិ