ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងមួយ ស្តីពីការបញ្ចប់ការផ្តល់ប្រាក់ឧបត្ថម្ភ សម្រាប់កម្មករនិយោជិត ដែលព្យួរកិច្ចសន្យាការងារក្នុងវិស័យទេសចរណ៍ លើកលែងតែសណ្ឋាគារក្នុងខេត្តសៀមរាប។

យោងតាមសេចក្តីជូនដំណឹងរបស់ក្រសួងការងារ​ និងបណ្តុះបណ្តាលវិជ្ជាជីវៈ បង្ហាញនៅល្ងាច​ថ្ងៃទី១៤ មិថុនា ឆ្នាំ ២០២២នេះ បានឱ្យដឹងថា ដោយសារការឆ្លងរីករាលដាលជំងឺកូវីដ-១៩ នៅ​តាមរោងចក្រ សហគ្រាស ត្រូវបានគ្រប់គ្រង​ប្រកបដោយប្រសិទ្ធភាពខ្ពស់ ធ្វើឱ្យអាជីវកម្មក្នុង​វិស័យទេសចរណ៍ ដូចជា​សណ្ឋាគារ​ ផ្ទះសំណាក់​ ភោជនីយដ្ឋាន​ និង ​ភ្នាក់ងារទេសចរណ៍ ក្នុង​បណ្តារាជធានី ខេត្ត បានបើកដំណើរការជាបណ្តើរៗឡើងវិញ។

យោងសេចក្តីជូនដំណឹងរបស់ក្រសួងសេដ្ឋកិច្ច​ និងហិរញ្ញវត្ថុ ក្រសួងការងារនិងបណ្តុះបណ្តាល​វិជ្ជាជីវៈ ​សូមជូនដំណឹងដល់ម្ចាស់​ ឬនាយកសហគ្រាស និងកម្មករ និយោជិតក្នុងវិស័យទេសចរណ៍​មេត្តាជ្រាបថា រដ្ឋាភិបាលបានសម្រេចបញ្ចប់​ការអនុវត្តវិធានការរាជរដ្ឋាភិបាល​ក្នុងការផ្តល់ប្រាក់​ឧបត្ថម្ភចំនួន ៤០ដុល្លារអាម៉េរិក ក្នុង១ខែ ​សម្រាប់កម្មករនិយោជិត ដែលព្យួរកិច្ចសន្យាការងារ​ក្នុង​វិស័យទេសចរណ៍ គិតចាប់ពីថ្ងៃទី១៤ ខែមិថុនា ឆ្នាំ២០២២តទៅ​ លើកលែងតែកម្មករនិយោជិត ដែលបម្រើការផ្នែកសណ្ឋាគារក្នុងខេត្តសៀមរាបប៉ុណ្ណោះ។

ក្រសួងការងារ បានបញ្ជាក់បន្ថែមថា​ ចាប់ពីថ្ងៃជូនដំណឹងនេះតទៅ ម្ចាស់ ​ឬនាយកសហគ្រាស ត្រូវអនុវត្តការព្យួរកិច្ចសន្យាការងារ​ តាមការព្រមព្រៀងគ្នា ​រវាងនិយោជក​ និងកម្មករនិយោជិត ស្របតាមខ្លឹមសារមាត្រា៧១ និង ៧២​ នៃច្បាប់ស្ដីពីការងារ៕ អត្ថបទ៖ បូរ៉ាវី