ប៉ៃលិន ៖ លោកជំទាវ បាន ស្រីមុំ អភិបាលខេត្តប៉ៃលិន បានបន្តចុះចែកអំណោយមនុស្សធម៌ ដល់ប្រជាពលរដ្ឋ ដែលមានជីវភាពខ្វះខាត នៅក្នុងខេត្តប៉ៃលិន ដោយមិនប្រកាន់និន្នាការនយោបាយឡើយ នៅល្ងាចថ្ងៃទី១៤ ខែមិថុនា ឆ្នាំ២០២២។

លោកជំទាវ បានចុះជួបសួរសុខទុក្ខ ព្រមទាំងផ្តល់ស្បៀងអាហារ រទេះជនពិការ ថវិកាជូនចាស់ជរា និងជនពិការ នៅតំបន់ដាច់ស្រយាលនៅភូមិភ្នំរាំង ភូមិក្រចាប់ សង្កាត់អូរតាវ៉ៅ ក្រុងប៉ៃលិន ចំនួន៥គ្រួសារ ដែលកំពុងជួបការខ្វះខាតក្នុងជីវភាពប្រចាំថ្ងៃ។

លោកជំទាវ បាននាំបណ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនចំពោះចាស់ជរា អ្នកជំងឺ ជនពិការ និងប្រជាពលរដ្ឋក្នុងភូមិ ដែលជានិច្ចកាលសម្តេចទាំងទ្វេ តែងយកចិត្តទុកដាក់ពីជីវភាពរស់នៅរបស់ពលរដ្ឋ ដោយមិនទុកឱ្យប្រជាពលរដ្ឋណាម្នាក់ដាច់បាយស្លាប់ ដោយមិនបានដឹង និងមិនបានដោះស្រាយនោះឡើយ៕