សៀមរាប៖ អាជ្ញាធរជាតិអប្សរា តាមរយៈនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ កំពុងបំពេញបន្ថែមលើការងារជួសជុលកែលម្អខ្លោងទ្វារខាងកើតប្រាសាទតានៃ មានដូចជា ការងារដាប់ឆ្លាក់សសរពេជ្រទាំង៤ជ្រុងនៃខ្លោងទ្វារខាងកើតប្រាសាទតានៃ ដែលបានបន្ថែមថ្មថ្មី ជំនួសថ្មចាស់ដែលបាត់បង់ និងខូចខាតមិនអាចប្រើវិញបាន ដើម្បីរក្សាលំនឹងរបស់ប្រាសាទទាំងមូល។

លោក ថៃ ឌីយ៉ាម៉ង់ ស្ថាបក្យករ នៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ មានប្រសាសន៍ថា ដំណើរការជួសជុលនេះ មានរយៈពេល១ខែ ចាប់ដំណើរការនៅដើមខែមិថុនា ឆ្នាំ២០២២ គ្រោងនឹងបញ្ចប់ចុងខែមិថុនាខាងមុខនេះ។

គួរបញ្ជាក់ថា ការជួសជុលខ្លោងទ្វារខាងកើតប្រាសាទតានៃ ចាប់ផ្តើមតាំងពីឆ្នាំ២០១៩ និងបានបញ្ចប់នៅចុងឆ្នាំ២០២០កន្លងទៅ ដោយបញ្ហាប្រឈមខ្លាំងរបស់ខ្លោងទ្វារខាងកើតប្រាសាទតានៃ គឺរចនាសម្ពន្ធរទាំងមូលរបស់ខ្លោងទ្វារតែម្តង ដោយមានឬស និងដើមឈើ ធ្វើឱ្យគ្រឹះរំកិលចេញពីទីតាំងដើម បណ្តាលឱ្យថ្មជញ្ជាំងហែកចេញពីគ្នានឹងអាចបាក់រលំ។ ឯដំបូលថ្មបានជ្រុះធ្លាក់ស្ទើរទាំងស្រុង ហើយការជួសជុលនេះ ដោយប្រើបច្ចេកទេសអាណាស្ទីឡូ (anastylosis)៕