អន្ដរជាតិ៖ រដ្ឋាភិបាលប៊ូគីណា ហ្វាសូ ស្ថិតនៅអាហ្វ្រិកខាងលិច បាននិយាយកាលពីថ្ងៃអង្គារម្សិលមិញថា ចំនួន​ជនរង​គ្រោះ​ដោយ​សារការវាយប្រហាររបស់ក្រុមខ្មាន់កាំភ្លើងកាលពីចុងសប្តាហ៍កន្លងទៅនៅតំបន់សាហេល បាន​កើន​ឡើងដល់ ៧៩​នាក់ ក្រោយ​អង្គភាពពិសេសដែលបានដាក់ពង្រាយទៅកាន់តំបន់នោះ បានរកឃើញសាកសព​មនុស្សបន្ថែមទៀត។

សេចក្តីថ្លែងការណ៍​របស់រដ្ឋាភិបាលប៊ូគីណា ហ្វាសូ បានឲ្យដឹងថា ចំនួនមនុស្សស្លាប់នេះ នៅតែជាតួលេខបឋម​នៅឡើយ ហើយប្រតិបត្តិការសន្តិសុខនៅទីក្រុងស៊ីតេនហ្គា ជាទីដែលកើតហេតុ មានការយឺតយ៉ាវដោយសារ​តែ​ប្រឈមនឹង​គ្រឿងផ្ទុះ ដែលបន្សល់ទុកដោយ​ក្រុមវាយប្រហារ ៕