មីយ៉ាន់ម៉ា៖ កាលពីថ្ងៃព្រហស្បតិ៍ម្សិលមិញ សហរដ្ឋអាមេរិក និងអង់គ្លេសបានដាក់ទណ្ឌកម្មទៅលើក្រុមហ៊ុនធំៗ ដែលគ្រប់គ្រងដោយយោធាសហភាពមីយ៉ាន់ម៉ា បន្ទាប់ពីរដ្ឋប្រហាររបស់លោកឧត្តមសេនីយ៍ មីន អ៊ុងលាំង និងវិធានការបង្ក្រាបយ៉ាងធ្ងន់ដៃ ពីសំណាក់យោធាទៅលើក្រុមបាតុករ ក្នុងនោះទីក្រុងវ៉ាស៊ីនតោនបានអំពាវនាវ ឲ្យមានការឆ្លើយតបនឹងអំពើហិង្សា និងការបំពានទាំងអស់នេះ។
ក្រសួងរតនាគារសហរដ្ឋអាមេរិកបាននិយាយថា ទណ្ឌកម្មរបស់ខ្លួនមានគោលដៅទៅលើក្រុមហ៊ុន Myanma Economic Holdings Public Company Ltd (MEHL) និងក្រុមហ៊ុន Myanmar Economic Corporation Ltd (MEC)។ ខណៈពេលនោះដែរ ចក្រភពអង់គ្លេសបានដាក់ទណ្ឌកម្ម ស្រដៀងគ្នាទៅលើក្រុមហ៊ុន MEHL ដោយពួកគេបានលើកពីហេតុផលថា យោធាសហភាពមីយ៉ាន់ម៉ាបំពានយ៉ាងធ្ងន់ ផ្នែកសិទ្ធិមនុស្សទៅលើជនមូស្លីមរ៉ូហ៊ីងយ៉ា។ ទោះបីជាយ៉ាងណាក៏ដោយ ក្រុមតំណាងក្រុមហ៊ុនទាំង២ ដែលគ្រប់គ្រងផ្នែកធំៗនៃសេដ្ឋកិច្ចសហភាពមីយ៉ាន់ម៉ា មិនបានធ្វើសេចក្តីអត្ថាធិប្បាយភ្លាមៗនោះទេ ពេលដែលទីភ្នាក់ងារព័ត៌មានរ៉យទ័រ រាយការណ៍ពីទណ្ឌកម្មទាំងនេះកាលពីថ្ងៃពុធ។
ចំណាត់ការរបស់ទីក្រុងវ៉ាស៊ីនតោននេះដែរ នឹងបង្កករាល់អចលនទ្រព្យទាំងឡាយណា ដែលគ្រប់គ្រងដោយអង្គភាពទាំង២ នៅសហរដ្ឋអាមេរិក ហើយវាក៏ជាទណ្ឌកម្មចុងក្រោយគេផងដែរ ទៅលើធនាគារកណ្ដាលមីយ៉ាន់ម៉ា និងក្រុមឧត្តមសេនីយ៍ បន្ទាប់ពីយោធាដណ្ដើមអំណាចពីរដ្ឋាភិបាលស៊ីវិល កាលពីថ្ងៃទី១ ខែកុម្ភៈ ឆ្នាំ២០២១ កន្លងទៅ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
