បាល់ទាត់៖ ប្រជាពលរដ្ឋ និងយុវជន-យុវតីយ៉ាងច្រើនកុះករបានចូលរួមទស្សនា និងថតរូបអនុស្សាវរីយ៍ផ្ទាល់ជាមួយពានរង្វាន់បាល់ទាត់ពិភពលោក ខណៈពានរង្វាន់ដ៏មានតម្លៃនេះត្រូវបានតាំងបង្ហាញ ក្នុងវិមានកីឡដ្ឋាននៃពហុកីឡដ្ឋានជាតិមរតកតេជោរយៈពេល ៧ម៉ោងចាប់ពីម៉ោង ៣រសៀលរហូតដល់ម៉ោង ១០យប់ថ្ងៃទី១៥ ខែមិថុនា ឆ្នាំ២០២២ ម្សិលមិញ។
ក្រោយបានចូលទស្សនា និងថតរូបហើយ ប្រជាពលរដ្ឋ និងយុវជនទាំងអស់បានបង្ហាញទឹកមុខសប្បាយរីករាយ និងបង្ហាញនូវមោទនភាពក្រៃលែង ចំពោះវត្តមានពានរង្វាន់បាល់ទាត់ពិភពលោកនៅកម្ពុជា ដែលប្រជាជនគ្រប់រូបលើពិភពលោក មិនថាតែកីឡាករនោះទេ តែងចង់ឃើញផ្ទាល់ភ្នែក។ ក្នុងនោះលោក ហុក សុចិត្រា អតីតកីឡាករ និងគ្រូបង្វឹកជម្រើសជាតិកម្ពុជា ក៏នាមប្រជាពលរដ្ឋម្នាក់ ក៏យល់យ៉ាងដូច្នេះដែរ ហើយលោកសង្កត់ធ្ងន់ថា ដោយសារកត្ដាសន្ដិភាព និងការអភិវឌ្ឍទើបដំណើរគោលចរពានមាសសុទ្ធនេះធ្វើដំណើរមកដល់កម្ពុជា។ ទន្ទឹមជាមួយគ្នា ឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ដែលបានដឹកនាំប្រតិភូចូលថតរូបអនុស្សាវរីយ៍ដែលនោះ បានសម្ដែងនូវសេចក្ដីរីករាយដែលឃើញប្រជាពលរដ្ឋ និងយុវជន-យុវតីបានចូលរួមអបអរនូវព្រឹត្តិការណ៍ប្រវត្តិសាស្ដ្រថ្មីលើដែនដីកម្ពុជា នៃដំណើរទេសចរណ៍ពានរង្វាន់បាល់ទាត់ពិភពលោកមួយនេះ។
ឯកឧត្តមបន្ដថា ទោះបីពាននេះត្រូវបានដាក់ឲ្យថតរូបនៅក្នុងប្រអប់ក៏ពិតមែន តែក៏ជាកិត្តិយសសម្រាប់ប្រជាពលរដ្ឋកម្ពុជា ពិសេសសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាគឺជាបុគ្គលទី១ របស់កម្ពុជា ដែលបានកាន់ និងលើកពានដែលមានតម្លៃជាសកលនេះដោយផ្ទាល់ ក្នុងនាមប្រមុខរដ្ឋាភិបាលកម្ពុជា។ តាមរយៈនេះ ឯកឧត្តមបានអំពាវនាវឲ្យបងប្អូនប្រជាពលរដ្ឋ បន្ដចូលរួមគាំទ្រគ្រប់សកម្មភាពកីឡាបន្ថែមទៀត ដើម្បីចូលរួមជំរុញការផ្សព្វផ្សាយ និងអភិវឌ្ឍន៍វិស័យកីឡាជាតិ ឆ្ពោះទៅរកភាពជោគជ័យនៃព្រឹត្តិការណ៍ស៊ីហ្គេម-អាស៊ានប៉ារ៉ាហ្គេមឆ្នាំ២០២៣។ សូមបញ្ជាក់ថា ពានរង្វាន់បាល់ទាត់ពិភពលោក ត្រូវបានដង្ហែមកដល់កម្ពុជាកាលពីព្រឹកថ្ងៃទី១៥ ខែមិថុនាដែលជាពានមាសសុទ្ធមានតម្លៃ ២០លានដុល្លារ និងមានតម្លៃធានារ៉ាប់រងរហូតដល់ ២០០លានដុល្លារ។ បន្ទាប់មកពានតំណាងឲ្យមនុស្សជាតិលើពិភពលោកនេះ បានដង្ហែទៅវិមានសន្ដិភាពដោយមានការទទួលស្វាគមន៍ និងលើកពានផ្ទាល់ដោយសម្ដេចតេជោនាយករដ្ឋមន្ដ្រី។
កម្ពុជាគឺជាប្រទេសទី២១ ក្នុងចំណោម ៥១ប្រទេសដែលត្រូវបានដំណើរទេសចរណ៍ពានរង្វាន់បាល់ទាត់ពិភពលោកឆ្លងកាត់ ហើយនឹងត្រូវបន្ដធ្វើដំណើរចំនួន ៣០ប្រទេសផ្សេងទៀតមុនដាក់ពាននេះ ឲ្យធ្វើការប្រកួតប្រជែងនៅជុំផ្ដាច់ព្រ័ត្រនៃពានរង្វាន់ FIFA World Cup 2022 ដែលនឹងត្រូវចាប់ផ្ដើមការប្រកួតពីថ្ងៃទី២១ ខែវិច្ចឆិការហូតដល់ថ្ងៃទី១៨ ខែធ្នូ ឆ្នាំ២០២២ ខាងមុខនៅទីក្រុងដូហា ប្រទេសកាតា៕ អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
