ចិន៖ លោកប្រធានាធិបតីចិន Xi Jinping កាលពីថ្ងៃពុធបានធានាចំពោះលោក Vladimir Putin អំពីការគាំទ្ររបស់ចិនលើបូរណភាពទឹកដី និងសន្តិសុខរបស់រុស្ស៊ី ដែលនាំឲ្យក្រុង Washington ព្រមានក្រុង Beijing ថា វាប្រឈមទៅនឹងការបញ្ចប់ក្នុងដំណាក់កាលខុសនៃប្រវត្តិសាស្ត្រ។
ចិនពុំបានថ្កោលទោសការវាយប្រហារដោយយោធាទ្រង់ទ្រាយធំរបស់ក្រុង Moscow ទៅលើអ៊ុយក្រែនទេ និងត្រូវបានចោទប្រកាន់ពីបទជួយជ្រោមជ្រែងផ្នែកការទូតដល់រុស្ស៊ី ដែលកំពុងរួបរឹតដោយទណ្ឌកម្មលោកខាងលិច និងការលក់អាវុធឲ្យអ៊ុយក្រែន។ ទូរទស្សន៍រដ្ឋចិន CCTV បានរាយការណ៍ ខណៈលោកប្រធានាធិបតី Xi ថ្លែងអំឡុងការសន្ទនាតាមទូរស័ព្ទជាមួយប្រធានាធិបតី Putin ថា ប្រទេសចិនមានបំណងបន្តផ្ដល់ការគាំទ្រទៅវិញទៅមកដល់រុស្ស៊ី លើបញ្ហាក្ដីកង្វល់ផលប្រយោជន៍ជាតិដ៏សំខាន់ និងក្ដីបារម្ភដ៏ធំដូចជាបូរណភាពទឹកដី និងសន្តិសុខជាតិ។ នេះជាការសន្ទនាតាមទូរស័ព្ទលើកទី២ ដែលត្រូវបានរាយការណ៍រវាងមេដឹកនាំទាំង២ ចាប់តាំងពីលោក Putin បញ្ជាឲ្យបើកប្រតិបត្តិការសឹកលើអ៊ុយក្រែនកាលពីថ្ងៃទី២៤ កុម្ភៈ។
តាមសេចក្ដីរាយការណ៍លោក Xi និយាយថា ក្រុង Beijing មានបំណងបង្កើនការសម្របសម្រួលជាយុទ្ធសាស្ត្ររវាងប្រទេសទាំង២។ ចំណែកវិមានក្រឹមឡាំងបាននិយាយថា មេដឹកនាំទាំង២ បានព្រមព្រៀងពង្រីកកិច្ចសហប្រតិបត្តិការសេដ្ឋកិច្ចលើបញ្ហាចំពោះមុខ នៃទណ្ឌកម្មខុសច្បាប់របស់លោកខាងលិច៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
