រុស្ស៊ី៖ ប្រទេសរុស្ស៊ីបានបើកវេទិកាសេដ្ឋកិច្ចប្រចាំឆ្នាំ ជាការជួបជុំទ្រង់ទ្រាយធំលើកដំបូងរបស់ប្រទេសនេះ បន្ទាប់ពីមានការលុកលុយចូលអ៊ុយក្រែន។ អ្នកចូលរួមឆ្នាំនេះភាគច្រើនមកពីប្រទេសដែលមានទំនាក់ទំនងល្អជាមួយរុស្ស៊ី។
វេទិកាសេដ្ឋកិច្ចអន្តរជាតិ St. Petersburg បានចាប់ផ្តើមកាលពីថ្ងៃពុធ។ ក្រុមអ្នករៀបចំបាននិយាយថា មេដឹកនាំធុរកិច្ច និងមន្ត្រីរដ្ឋាភិបាលមកពី ១១៥ប្រទេស និងតំបន់ត្រូវបានគេរំពឹងថានឹងចូលរួមក្នុងព្រឹត្តិការណ៍រយៈពេល ៤ថ្ងៃនេះ។ លោកប្រធានាធិបតី Vladimir Putin យកចិត្តទុកដាក់ចំពោះការជួបជុំដ៏សំខាន់នេះ។ កាលពីកន្លងទៅបណ្ដាមេដឹកនាំនៃក្រុមសេដ្ឋកិច្ចធំៗទាំង៧ ឬ G7 បានចូលរួម។ អតីតនាយករដ្ឋមន្ត្រីជប៉ុនលោក Abe Shinzo និងប្រធានាធិបតីបារាំង Emmanuel Macron ស្ថិតក្នុងចំណោមមេដឹកនាំទាំងនោះ។ ប៉ុន្តែវេទិកាចុងក្រោយនេះមើលទៅខុសប្លែកពីពេលកន្លងទៅ ដោយសារគេបានឃើញអ្នកចូលរួមតិចតួចមកពីប្រទេសលោកខាងលិច និងសម្ព័ន្ធមិត្តដែលកំពុងបង្កើនទណ្ឌកម្មសេដ្ឋកិច្ចលើទីក្រុង Moscow។
អ្នកចូលរួមជាច្រើនមកពីបណ្តាប្រទេសនៅមជ្ឈិមបូព៌ា អាហ្វ្រិក និងអាមេរិកខាងត្បូង ព្រមទាំងរដ្ឋចំណុះក្នុងអតីតសហភាពសូវៀតផងដែរ។ ការិយាល័យប្រធានាធិបតីរុស្ស៊ីនិយាយថា ក្រុមហ៊ុនបរទេសប្រហែល ២៦០ កំពុងចូលរួម ខណៈដែលក្រុមហ៊ុនក្នុងស្រុកជាង ១,២០០ ត្រូវបានគេរំពឹងថានឹងចូលរួមដែរនោះ។ អ្នកនាំពាក្យវិមានក្រឹមឡាំងនិយាយថា លោក Putin នឹងថ្លែងសុន្ទរកថានៅថ្ងៃសុក្រស្អែក អំពីការកើនឡើងនៃតម្លៃធនធានធម្មជាតិ និងសន្តិសុខស្បៀងនៅក្នុងពិភពលោក៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
