ភ្នំពេញ៖ រដ្ឋមន្ត្រីក្រសួងសុខាភិបាល បានអះអាងថា គិលានុបដ្ឋាក គឺជាបេះដូងនៃការផ្តល់សេវាដែលមានគុណភាព និងសុវត្ថិភាពដល់អ្នកជំងឺ និងអតិថិជន។

ការថ្លែងរបស់ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល យ៉ាងដូច្នេះ នាឱកាសអញ្ជើញជាអធិបតីក្នុងពិធីបើកទិវាគិលានុបដ្ឋាកអន្តរជាតិ ឆ្នាំ២០២២ ក្រោមប្រធានបទ«គិលានុបដ្ឋាករួមគ្នាធ្វើឲ្យប្រសើរឡើងនូវការថែទាំ និងការគោរព​សិទ្ធិ​អតិថិជន ដើម្បីធានាបាននូវសុខភាពជាសកល» នាព្រឹកថ្ងៃទី១៦ ខែមិថុនា ឆ្នាំ២០២២ ដោយមានការចូលរួមពីតំណាងអង្គការWHO ប្រចាំកម្ពុជា, តំណាងJICA ប្រចាំកម្ពុជា, អង្គការUSAID ប្រចាំកម្ពុជា, អង្គការFHI360 និងប្រធានមន្ទីរពេទ្យរ៉ូយ៉ាល់ភ្នំពេញ។

ឯកឧត្តម សាស្រ្តាចារ្យ ម៉ម ប៊ុនហេង បានថ្លែងទៀតថា គិលានុបដ្ឋាក និង​ឆ្មប ជាអ្នកផ្តល់​សេវា​ទាំងផ្លូវកាយ ផ្លូវចិត្ត សង្គម និងតាមជំនឿសាសនា ​និងថែទាំតាមបែប​បុគ្គល​ជាមជ្ឈមណ្ឌល។

ម្យ៉ាងវិញទៀយពួកគេ គឺជាសមាជិកក្នុងសហគមន៍ ដែលពួកគេបម្រើការ យល់ពីវប្បធម៌នឹងកន្លែង និងអាច​មានឥទ្ធិពលក្នុងការផ្លាស់ប្តូរឥរិយាបថ ស្របតាមក្រមសីលធម៌គិលានុបដ្ឋាក។ ហើយគិលានុបដ្ឋាក មានគោលបំណងតែមួយគត់ គឺការបម្រើផលប្រយោជន៍​សាធារណៈឲ្យ​បានល្អ​បំផុត​ដែលអាចធ្វើទៅបាន។

តាមរយៈដំណើរការនៃ​ការផ្តល់​អាជ្ញាប័ណ្ណ​ដល់គិលានុបដ្ឋាក​នូវសិទ្ធិក្នុង​ការអនុវត្ត សិល្បៈ និង​វិទ្យាសាស្រ្តនៃការថែទាំ ​ដើម្បីបំពេញជូនសាធារណជននូវសេវាថែរក្សា​ដែលមានគុណភាព ប្រសិទ្ធភាព ​និងតម្លាភាព។

ឯកឧត្តម រដ្ឋមន្រ្តី បានសង្កត់ធ្ងន់ថា រដ្ឋាភិបាល នៃប្រទេសមួយចំនួនបាន​ទទួល​ស្គាល់​សក្ដានុពល នៃ​ការរីកចម្រើន​ នៃការថែទាំ និងកំពុងពង្រីកការអភិវឌ្ឍកម្លាំង​ពលកម្មថែទាំបន្ថែមទៀត។ អ្នកដឹកនាំសុខាភិបាល​ ជាច្រើនបានប្តេជ្ញាចិត្តធ្វើកិច្ចការនេះ​ ប៉ុន្តែភស្តុតាងបង្ហាញថាគិលានុបដ្ឋាក ជា​ញឹកញាប់​មាន​គុណ​តម្លៃនៅ​ទន់ទាប​នៅឡើយ។

រាជរដ្ឋាភិបាល​ក្រោម​ការ​ដឹកនាំ​ដ៏​ឈ្លាសវៃ ​និង​ប្រកប​ដោយ​គតិបណ្ឌិត​របស់​សម្តេចអគ្គមហាសេនា​បតី​តេជោ ហ៊ុន សែន ​នាយករដ្ឋមន្រី្ត​នៃព្រះរាជាណាចក្រកម្ពុជា ​បាន​យកចិត្តទុកដាក់ និង​បន្តធ្វើឲ្យប្រសើរឡើង​នូវសិទិ្ធដែលប្រជាពលរដ្ឋត្រូវទទួលបាននូវការថែទាំ និងព្យាបាលមាន​គុណភាព​ សុវតិ្ថភាព​ និងមានសមធម៌។

ឯកឧត្តម សាស្រ្តាចារ្យ ម៉ម ប៊ុនហេង បានបញ្ជាក់ទៀតថា ក្នុងរយៈពេលពីរឆ្នាំដែលមានការ​រាតត្បាត​ដោយ​ជំងឺកូវីដ-១៩ ​ពិតជាបានជួបប្រទះនូវការលំបាកជាច្រើនទាំង​នៅក្នុងប្រទេសកម្ពុជា និងសកលលោក។

បញ្ហាទាំងនោះ​មានដូចជា ការងារទទួលខុសត្រូវថែទាំអ្នកជំងឺកូវីដ-១៩ ព្រមទាំង​ការ​ផ្តល់សេវា​សារវន្ត​សំខាន់ៗ​ដែលមិនមែនសេវាជំងឺកូវីដ-១៩ ក្នុងនោះដែរមានជួបប្រទះកង្វះគិលានុបដ្ឋាក-យិកា ដោយពួកគេមានវ័យចូលនិវត្តន៍ច្រើន។ កត្តាទាំងនេះ តម្រូវឲ្យប្រទេសនីមួយៗ ធ្វើការចំណាយ​បន្ថែម​លើចំនួនគិលានុបដ្ឋាក ​នៅតាមមនី្ទរពេទ្យគ្រប់កម្រិត និងសាលាបណ្តុះបណ្តាល​គិលានុបដ្ឋាក​ដែលមានគុណវុឌ្ឍខ្ពស់ ​ដើម្បីបំពេញតម្រូវការសុខាភិបាលរបស់ប្រជាពលរដ្ឋ និង​សហគមន៍៕ អត្ថបទ រដ្ឋា