ភ្នំពេញ៖ តំណាងអង្គការសុខភាពពិភពលោកប្រចាំប្រទេសកម្ពុជា បានលើកឡើងថា ការពង្រឹងការថែទាំសុខ ភាពបឋម គឺជាវិធីសាស្រ្តមួយដ៏មានប្រសិទ្ធភាពដើម្បីបង្ការជំងឺផ្សេងៗ​នៅក្នុងសហគមន៍។

លោកស្រីវេជ្ជបណ្ឌិត លី អាយលែន តំណាងអង្គការសុខភាពពិភពលោកប្រចាំកម្ពុជា ក្នុងកម្មវិធី សិក្ខាសាលាតម្រង់ទិស ស្ដីពីការចូលរួមរបស់សហគមន៍ ក្នុងការតាមដានជំងឺកូវីដ-១៩ ជំងឺផ្ដាសាយ និង ជំងឺផ្លូវដង្ហើមផ្សេងៗ នៅខេត្តកំពង់ធំ កាលពីម្សិលមិញ បានបញ្ជាក់ថា អង្គការសុខភាព​ពិភព​លោក មានសេចក្តីរីករាយក្នុងការផ្តល់ការគាំទ្រផ្នែកបច្ចេកទេស និងហិរញ្ញវត្ថុដល់​ក្រសួង​សុខាភិបាល ក្នុងជំរុញការងារថែទាំសុខភាពបឋមនៅកម្ពុជា ​ការពង្រឹងការចូលរួមរបស់​សហគមន៍ រួម​បញ្ចូល​ទាំងការអនុវត្តតាម វិធានការ ការពារ និងបង្ការ ​ការកែលម្អការប្រាស្រ័យទាក់ទង ការ​សម្របសម្រួល និងការរាយការណ៍ប្រសើរឡើង រវាងអាជ្ញាធរសុខាភិបាល និងអ្នកផ្តល់សេវាថែទាំ​សុខភាព និងអ្នកគ្រប់គ្រង។

លោកជំទាវវេជ្ជបណ្ឌិត ឱ វណ្ណឌីន ប្រធានក្រុមការងារអភិវឌ្ឍន៍ និងគ្រប់គ្រងក្របខណ្ឌអនុវត្តការ ជំរុញបង្កើនការងារថែទាំសុខភាពបឋម មានប្រសាសន៍ដែរថា ផ្អែកលើបទពិសោធន៍នៃការគ្រប់គ្រង និងការឆ្លើយតបនឹងជំងឺកូវីដ-១៩​ បានឱ្យឃើញថា​ ការចូលរួមរបស់បណ្ដាញសហគមន៍ នៅក្នុងការ​អនុវត្ត វិធានការការពារការចម្លងជំងឺនានា គឺជាចំណុចសំខាន់ក្នុងការចូលរួមចំណែក​សម្រេច​បាន​ជោគជ័យនូវ ​កិច្ចការឆ្លើយតបទៅនឹងជំងឺកូវីដ-១៩នេះ។

ការផ្តោតលើការថែទាំសុខភាពបឋម ជាមូលដ្ឋានគ្រឹះឆ្ពោះទៅរកការគ្របដណ្តប់សុខភាពជា សកល (UHC) ត្រូវបានរួម​បញ្ចូល​ជាធាតុមួយដ៏សំខាន់ ​នៃការអភិវឌ្ឍផែនការយុទ្ធសាស្រ្តសុខាភិបាល កម្ពុជា​ ២០២២-២០៣០ (HSP4) ដែលដឹកនាំ​ដោយក្រសួងសុខាភិបាល។

ក្របខណ្ឌអនុវត្តការជំរុញ ​បង្កើនការងារថែទាំសុខភាពបឋម “PHC Booster” នឹងបម្រើជា​មធ្យោបាយ​មួយ​ដ៏មាន​ប្រសិទ្ធភាពបំផុត ​សម្រាប់​ប្រទេសកម្ពុជា ដើម្បីឆ្ពោះទៅ​សម្រេច​ការ​គ្រប​ដណ្តប់​សុខភាព​ជាសកល ​និងគោលដៅអភិវឌ្ឍន៍ ដោយចីរភាព៕អត្ថបទ៖ ទូច សោភ័ណ