​រុស្ស៊ី៖ យោធា​រុស្ស៊ី​បាន​ចែករំលែក​វីដេអូ​កាលពី​ថ្ងៃ​ពុធ​ដែល​ខ្លួន​អះអាងថា ​បានបង្ហាញ​ពី​មី​ស៊ី​ល​រយៈ​ចម្ងាយ​ឆ្ងាយ​មាន​សមត្ថភាព​ខ្ពស់​ស៊ី​ប​គោលដៅ​ ដែល​ត្រូវ​បាន​បាញ់​ទៅលើ​ឃ្លាំង​អាវុធ​មួយ​កន្លែង​នៅ​ទីក្រុង Lviv ភាគ​ខាងលិច​។​

​អ្នកនាំពាក្យ​ក្រសួងការពារជាតិ​រុស្ស៊ី​លោក Igor Konashenkov បាន​និយាយ​ថា កងកម្លាំង​រុស្ស៊ីបាន​ប្រើប្រាស់​មី​ស៊ី​ល Kalibr ដើម្បី​កម្ទេច​ឃ្លាំង​អាវុធ​នៅ​ជិត​ទីក្រុង Zolochiv ជិតព្រំដែន​ជាមួយប្រទេស​ប៉ូឡូញ​។​ លោក Konashenkov បាន​និយាយថា គ្រាប់រំសេវ​សម្រាប់​អាវុធ​ដែល​ផ្គត់ផ្គង់ដោយ​អង្គការ​ណា​តូ ព្រមទាំង​គ្រាប់ផ្លោង​សម្រាប់​កាំភ្លើង​ធំ M777 កំពុង​ត្រូវបាន​រក្សាទុក​នៅ​ទីនោះ​។​

​លោក​បាន​និយាយថា ការវាយប្រហារ​តាម​អាកាស​របស់​រុស្ស៊ី​ក៏បាន​បំផ្លាញ​ យុទ្ធោបករណ៍​ដែន​អាកាស​របស់​អ៊ុយ​ក្រែ​ននៅ​អាកាសយានដ្ឋាន​យោធា​មួយ​កន្លែង​ក្នុង​ទីក្រុង Mykolaiv ភាគខាងត្បូង​។ ក្រសួងការពារជាតិ​រុស្ស៊ីបាន​ចែក​រំលែក​វីដេអូ​ នៃ​រថយន្តយោធា​បាញ់​ផ្លោង​ចេញពី​ទីវាល​មួយ និងរូបភាព​នៃ​ការវាយប្រហារ​ពីលើ​អាកាស​។ សារព័ត៌មាន AP មិន​អាច​ផ្ទៀងផ្ទាត់​ដោយ​ឯករាជ្យ​នូវ​កាល​បរិច្ឆេទ ទីតាំង ឬ​លក្ខខណ្ឌ ដែល​វីដេអូទាំងនេះ​ត្រូវបាន​ថត​នោះទេ៕

អត្ថបទ៖ ប៊ុនថន